د ارزګان سیمه ییز چارواکي وايي، دغه ولایت کې له تېرو ۱۵ ورځو راهیسې د خالد په نوم پیل شوي عملیاتو کوم پایله نهده درلوده او لاهم وسلهوال طالبان د ترینکوټ ښار په دوه کېلومترۍ کې دي.
ارزګان کې د ولایتي شورا یوه غړي حیاتالله فضلي د جمعې په ورځ ازادي راډيو ته وویل چې دغه ولایت کې یو شمېر هغه سیمې بېرته د طالبانو لاسته لوېدلي چې وړاندې افغان امنیتي ځواکونو له وسلهوالو طالبانو څخه تصفیه کړې وې.
ښاغلي فضلي زیاته کړه:
"ارزګان کې افغان امنیتي ځواکونه په خپل منځ کې پوره همغږي نهلري، قوماندان تش په نوم دی امر يې څوک نه مني، نو دا به څنګ عملیات پرمختګ وکړي."
دا په داسې حال کې ده چې د مسؤلینو په خبره له تېرو اتو میاشتو راهیسې دغه ولایت کې افغان امنیتي ځواکونو د طالبانو د ځپلو په هدف عملیات پیل کړي خو لاهم د ټولو ولسوالېو لارې ترینکوټ سره تړلي.
په ورته وخت کې د ارزګان ولایت امنیتي مسؤلین وايي، دغه ولایت کې يې وسلهوال طالبان سخت ځپلي.
د ارزګان ولایت امنیه قوماندان مل پاسوال غلام فاروق سنګري د ولایتي شورا ادعاوې ردوي.
نوموړی وايي چې دغه ولایت کې د خالد په نوم پیل شویو عملیاتو کې وسلهوال طالبان يې له ماتې سره مخ کړي او په خبره یې چې د ارزګان مرکز ترینکوټ زیات شمېر سیمې له وسلهوالو طالبانو څخه تصفیه کړي دي.
ښاغلي سنګري وايي:
"زموږ عملیات اوس هم دغه ولایت کې د وسلهوالو طالبانو د ځپلوپه هدف روان دي او عملیات ځکه سوکه دي چې موږ هغه تصفیه شوو سیمو کې پخې پوستې جوړوو او بل طالبانو د ملکي خلکو په کورونو کې ماینونه ښخ کړي."
ښاغلي سنګري دا هم وویل چې تېره ورځ يې د ارزګان ولایت مرکز ترینکوټ په یو شمېر سیمو کې د افغان ګډو ځواکو لهخوا عملیات کړي چې پر مهال يې ۱۱وسلهوال طالبان وژلي او یو شمېر نور يې ټپیان کړي او په خبره یې ۱۲کړۍ ماینونه هم کشف او شنډ کړي.
د یادونې وړ ده چې درې ورځې وړاندې د دغه ولایت امنیه قوماندان مل پاسوال غلام فاروق سنګري ویلي و چې د دغه جګړه روسي جنرالان رهبري کوي.
راپور:شریف الله شرافت ـ ارزګان