د امریکا د ملي امنیت سلاکار د یوه جګپوړي امریکایي پلاوی په مشرۍ افغانستان ته ځي. مکمسټر چې په فبروري کې د امریکا د ملي امنیت سلاکار وټاکل شو دا یې د ملي امنیت د سلاکار په توګه افغانستان ته لومړی رسمي سفر دی.
داسې ویل کېږي چې دا سفر به د افغانستان لپاره د امریکا د ولسمشر ډونالډ ټرمپ پالیسي روښانه کړي.
تمه ده چې د امریکا د متحد ایالتونو د ملي امنیت سلاکار به کابل کې له افغان چارواکو سره خبرې وکړي.
کابل ته د مکمسټر د سفر په اړه د افغانستان د ملي دفاع د وزارت ویاند جنرال دولت وزیري ازادي راډیو ته وویل:
"دقیقه نیټه یې ماته معلومه نهده، خو د امریکا د متحد ایالتونو حکومت په ډېرو برخو کې له افغانستان سره مرسته کوي، د وسلهوال پوځ په تجهیز او تسلیح کې، همدا راز په ښوونه او روزنه کې له موږ سره مرسته کوي. د امریکا هر لوړ پوړی چارواکی چې افغانستان ته راځي او کله چې لیدنې کتنې کوي، هڅې یې دا وي چې څرنګه کیدای شي چې افغان پوځ تقویه شي."
د امریکا د ملي امنیت سلاکار په داسې وخت کې کابل ته ځي چې ټاکل شوې ده شاوخوا دوو اونیو کې واشنګټن ۳۰۰ امریکایي پوځیان هلمند ته واستوي.
په افغانستان کې د ناټو پخواني سلاکار شفیق همدم له امریکا په ټیلیفون ازادي راډیو ته وویل چې د امریکا دغه پلاوی چې د نورو مشرانو ترڅنګ به د ولسمشر ډونالډ ټرمپ یو جګپوړی سلاکار هم پهکې وي د افغانستان په اړه خپل نظر بېرته ټرمپ ته راوړي او د هغه له مخې به د امریکا نوی حکومت د افغانستان په اړه خپله تګلاره روښانه کړي.
شفیق همدم زیاته کړه:
"دلته واشنګټن ډي سي کې د دغه پلاوي چمتوالی له څو اونیو راهیسې روان دی. د ټرمپ اداره کې دا لومړی ځل دی چې داسې لوړپوړی پلاوی افغانستان ته ځي. دا سفر یوازې دا نه چې د جګپوړو چارواکو له لوري ترسره کېږي، دا سفر په داسې زمان کې ترسره کېږي چې نه یوازې افغانستان کې بلکه په سیمه کې، په روسیه کې ان په نړیواله کچه د ناټو په کچه هم د افغانستان په اړه بحثونه او خبرې دوام لري."
د امریکا د ملي امنیت سلاکار به له کابله وروسته د شنبې یا یکشنبې په ورځ اسلاماباد ته ولاړ شي او له هغه ځایه به هند ته سفر وکړی.
هندوستان ټایمز ورځپاڼې هند ته د مکمسټر د سفر په اړه په خپاره کړي مطلب کې د یوه چارواکي په وینا چې نوم یې نهدی اخیستی لیکلي دي، د امریکا د ملي امنیت سلاکار به په افغانستان کې دا مسئله وڅېړي چې نور امریکایي پوځیان دغه هېواد ته واستول شي که څرنګه؟