د افغانستان د علماوو شورا د دغه هېواد په اړه د پاکستان د جمعیتالعلماء پاکستان د مشر مولانا فضلالرحمن څرګندونې له دښمنۍ او غرضه ډکې ګڼي او غندي یې.
د افغانستان د علماوو شورا ویاند مولوي محمد قاسم حلیمي د دوشنبې په ورځ ازادي راډیو ته وویل، مولانا فضلالرحمن تل د افغانستان د قانوني حکومت پر ضد د وسلهوالو طالبانو ملاتړ کړی او هغوی یې ناروا جګړې ته لمسولي دي.
ښاغلي مولوي حلیمي وویل، مولانا فضلالرحمن دا ډول څرګندونې د دیني احکامو له مخې نه بلکې د پاکستان د استخباراتي کړیو په خوښه او اراده کوي.
نوموړی وايي:
"فضلالرحمن بیا هم خپل له دښمنۍ ډک نظر وړاندې کړی، موږ ولیدل چې د افغانستان له اکثرو ولایتونو څخه بهرني بیرغونه ټول او امنیتي چارې افغان ځواکونو ته وسپارل شوې خو مخالفین په هېڅ ولایت کې هم سولې ته اماده نهشول، د دوی جنګ له افغانانو او مسلمانانو سره دی او موږ د فضلالرحمن خبرې په کلکه غندو."
د پاکستان د جمعیتالعلماء پاکستان مشر مولانا فضلالرحمن تېره ورځ د پاکستان د جمعیتالعلماء اسلام ګوند د سلمې کلیزې په مناسبت جوړې شوې غونډې ته ویلي، تر کومه چې بهرني ځواکونه افغانستان کې مېشت وي، هغه هېواد کې سوله نهشي راتلی.
ده دا هم ویلي چې افغانستان کې د طالبانو واکمني د خلکو د خوښې واکمني وه.
د مولانا فضلالرحمن د دغو څرګندونو په وړاندې د کندهار ولایت دیني عالمانو هم غبرګون ښودلی او تېره ورځیې د سیمې د دیني عالمانو په یوې غونډه کې غندلي دي.
افغان چارواکي د پاکستان د جمعیتالعلماء د مشر څرګندونې د افغانستان کورنیو چارو کې لاسوهنه ګڼي او غندي یې.
د افغان حکومت د اجرائیه ریاست مرستیال ویاند امید میثم په دې اړه ازادي راډیو ته وویل:
"دا چې بهرنیان دې افغانستان کې مېشت وي او که نه؟ دا د افغانستان کورنۍ مسئله ده او افغانستان پورې اړه لري، کله چې د بهرنیانو د وتلو په اړه بحث وشي او تصمیم ونیول شي دا د حکومت کار دی، پرته له دې هېڅڅوک حق نهلري چې د افغانستان کورنیو چارو کې مداخله وکړي."
مولانا فضلالرحمن پخوا تر دې هم ویلي و چې افغانستان کې روان جنګ جایز دی.
د افغانستان د عالمانو شورا د دې ډول څرګندونو په اړه تل غبرګون ښودلی او ویلي یې دي چې افغانستان یو اسلامي هېواد دی، شرعي اصول او احکام پهکې جاري دي او هر څوک او هره ډله چې پهکې جنګ روا ګڼي، له اسلامي اصولو سرغړونه کوي.
راپور: خان محمد سیند