د لاسرسي لېنکونه

ټرمپ "سټېف بنن" د امنیت شورا له باصلاحیته دایمي غړیتوبه لیرې کړ


ډونالد ټرمپ خپل مشر سټراټیژیسټ او د خپل انتخاباتي کمپاین رئیس سټېف بنن «Steve Bannon» د امنیت شورا له باصلاحیته دایمي غړیتوبه لیرې کړ.

ټرمپ د کار په لومړیو کې سټېف بنن د امنیت شورا د دایمي غړي په توګه معرفي کړ چې د ډېرو خلکو تر انتقاد لاندې ونیول شو.

روېټرز خبري اژانس ته یوې سرچینې د نوم نه‌ښودلو په شرط ویلي چې سټېف بنن به د مشر سټراتیژیست په توګه خپلې دندې ته دوام ورکوي.

د امریکا متحده ایالاتو مرستیال ولسمشر مایک پنس «Mike Pence» له فاکس نیوز سره په ځانګړې مرکه کې پرون د سټېف بنن لیرې کېدل یو طبیعي امر وباله او ویې‌ویل چې هغه به په پالېسۍ کې خپل مهم رول جاري ساتي.

د امریکا متحده ایالتونو مرستیال ولسمشر مایک پنس
د امریکا متحده ایالتونو مرستیال ولسمشر مایک پنس

مایک پنس له فاکس نیوز سره په مرکه کې وویل:

"دا یو طبیعي امر دی. د دې لپاره چې دا یقیني شي چې ملي امنیت شورا په یوې داسې لارې تنظیم شوې چې ولسمشر ته د سختو مسایلو او پرېکړو په نیولو او هوارولو کې په ښه توګه خدمت وکړي."

د امریکا متحده ایالاتو د ولسمشر، مشر سټراټیژیست سټېف بنن هم په یوه بیان کې ځان په دې کار کې بریالی بللی چې د ده په خبره د امنیت شورا یې یوازې د بهرنۍ پالېسي له مخته وړونکې نه د دې شورا اصلي دندې ته د بهرنۍ پالېسي د همغږي کوونکې په توګه ورسوله.

سټېف بنن په خپل بیان کې د اوباما د ملي امنیت سلاکارې سوزان رائس ته اشاره کړې چې د ده په خبره د امنیت شورا یې عملیاتي کړې وه او دی د دې لپاره دې شورا ته راوستل شوی و چې دا شورا غیر عملیاتي کړي.

د سټېف بنن لیرې کېدل د ملي امنیت اوسني سلاکار هېربرټ رېمونډ مک‌مسټر «Herbert Raymond "H. R." McMaster» ته یوه بریا حسابېږي ځکه چې د رپوټونو په اساس د دوی دواړو تر منځ روابط ښه نه‌و.

ګڼو نورو خلکو هم د بنن د لیرې کولو له پرېکړې هرکلی کړی دی.

د امریکا متحده ایالاتو په استازو جرګه کې د استخباراتو کمېټې او د ډموکرات ګوند لوړپوړي غړي ادم شیف «Adam Schiff» په امنیت شورا کې وروستي بدلونونه مثبت بللي دي.

د امریکا متحده ایالاتو په استازو جرګه کې د استخباراتو کمېټې او د ډموکرات ګوند لوړپوړي غړي ادم شیف
د امریکا متحده ایالاتو په استازو جرګه کې د استخباراتو کمېټې او د ډموکرات ګوند لوړپوړي غړي ادم شیف

شیف ویلي دا کار به له مک‎مسټر سره مرسته وکړي چې په دې شورا چې د ده په خبره د بنن د دخالت په سبب سیاسي شوې وه کنټرول پیدا کړي.

د سپینې ماڼۍ یوه مقام اسوشیټېډ پرېس خبري اژانس ته ویلي چې په فبروري میاشت کې د ملي امنیت د پخواني سلاکار مایکل فلېن تر استعفی وروسته نور د امنیت شورا په چوکاټ کې د بنن موجودیت ته اړتیا نه‌وه.

د امریکا متحده ایالاتو په ملي امنیت شورا کې د بنن د غړیتوب له حذف سره دوو نورو مقاماتو ته اجازه ورکړل شوې چې په غونډو کې برخه ولري.

د لوی درستیزانو د ګډې کمېټې رئیس جنرال جوزېف ډانفورډ او د ملي استخباراتو د ادارې مشر ډن کاټس ته اجازه ورکول کېږي چې له دې وروسته د امریکا د ملي امنیت شورا په غونډو کې ګډون وکړي.

تمه ده د دغو بدلونونو رسمي اعلان نن د امریکا متحده ایالاتو د فدرالي ثبت ادارې له‎خوا هم وشي.

گزارش: صفي‌الله ستانکزی

XS
SM
MD
LG