د افغانستان د ولسي جرګې رئیس د افغانستان ځینو برخو کې د داعش مخ په زیاتیدونکي نفوذ د اندیښنې وړ بولي او ټینګار کوي چې افغان امنیتي او دفاعي بنسټونه باید دغه موضوع جدي ونیسي.
عبدالروف ابراهیمي د چهارشنبې په ورځ د ولسي جرګې عمومي غونډه کې وویل چې فاریاب، سرپل او غور ولایتونو کې د داعش د نفوذ په اړه د خلکو اندیښنې پرځای دي.
ښاغلي ابراهیمي که څه هم په دې اړه جزئیات ورنهکړل چې داعش جنګیالیو څنګه یادو ولایتونو کې نفوذ کړی خو دا یې وویل چې امنیتي ارګانونه باید د هر اړخېزې سټراټیژۍ په رامنځته کولو د دغه ګواښ مخه ونیسي.
نوموړي وویل:
"د سرپل او فاریاب ولایتونو سربېره غور کې د داعش نفوذ یو جدي ګواښ دی ستاسو اندیښنې پر ځای دي او حتماً به زموږ غږ امنیتي او دفاعي بنسټونه اوري، دوی باید شرایطو ته په کتو د یوې امنیتي او دفاعي سټراټیژۍ په رامنځته کولو سره دې برخه کې عملي اقدامات وکړي."
د ولسي جرګې رئیس فاریاب، سرپل او غور ولایتونو کې د داعش د نفوذ په اړه د یو شمېر وکیلانو له اندیښنو وروسته دا غوښتنه مطرح کړه.
تر دې وړاندې امنیتي ځواکونو جوزجان کې هم د بلال په نوم د داعش د یوې ۵۰ کسیزې ډلې د یوه قوماندان د نیولو خبر ورکړی وو.
په ننګرهار، کونړ او ځینو نورو ولایتونو کې هم داعش فعالیت لري خو افغان امنیتي مسؤلان وایي چې دا ډله یې سخته ځپلې او د لهمنځه وړلو لپاره یې عملیات روان دي.
په ورته وخت کې څه موده وړاندې د افغانستان د بهرنیو چارو وزیر صلاح الدین رباني هم واشنګټن کې د داعش ضد نړیوال کنفرانس کې ویلي و چې د داعش پر وړاندې د ګټورې مبارزې لپاره باید لومړی د دې ډلې مالي سرچینې وچې شي.
په همدې حال کې د افغانستان دفاع وزارت وايي، د داعش په ګډون د ټولو وسلهوالو مخالفو ډلو د ځپلو لپاره به له ټولو امکاناتو کار واخلي.
د دې وزارت د ویاند مرستیال محمد رادمنش په دې اړه وایي:
"دا اردو اوس کولای شي چې د هر هغه چا پر وړاندې اقدام وکړي چې افغانستان ته ګواښ پېښوي او موږ به د دغه ډلو د ځپلو لپاره له خپلو ټولو امکاناتو کار واخلو او غاښ ماتونکی ځواب به ورکړو."
ښاغلی رادمنش وايي، افغان امنیتي او دفاع ځواکونو په روان کال کې د احتمالي ګواښونو د لهمنځه وړلو او دفع کولو لپاره لازم چمتوالی نیولی خو د سراسري ثبات د ټینګښت لپاره د ده په خبره ضروري ده چې خلک هم د خپلو ځواکونو ترشاه ودرېږي او مرسته ورسره وکړي.
حدیث پردیس