د لاسرسۍ وړ لېنکونه

تازه خبر
جمعه ۱۰ وری ۱۴۰۳ کابل ۰۰:۵۱

م.م: ناامنیو څه د پاسه ۴۷ زره افغانان شااوخوا ۳ میاشتو کې بې‌ځایه کړي


د ملګرو ملتونو د تازه راپور له مخې د ۲۰۱۷ میلادي کال له پیل راهیسې په افغانستان کې تر اوسه پورې ۴۷ زره او ۴۰۴ کسان د نا امنیو د تازه څپې له امله له خپلو سیمو بېځایه شوي دي.

د راپور له مخې زیاتره بېځایه شوي کډوال د کندز او بغلان ولایتونو اوسېدونکي دي.

ملګري ملتونه وايي، د کندز هغه کورنۍ چې ښه امکانات‌يې هم لرل پر دې ښار د طالبانو د برید د اندېښنې له امله‌يې خپل کورونه پرېښي دي.

دا سازمان اندېښنه ښيي چې د روان میلادي کال تر پایه ښايي افغانستان کې د بېځایه شويو شمېره ۴۵۰ زرو ته لوړه شي.

د کډوالو او راستنېدونکو چارو وزارت وايي، دوی یوازې دې برخه کې د همغږۍ د رامنځته کولو رول ترسره کوي.

د دې وزارت مطبوعاتي سلاکار حفیظ احمد میاخېل ازادي راډیو ته وویل، دوی له بېځایه شويو سره د بشري مرستو په برخه کې اغېزمن کارونه کوي.

د کډوالو او راستنېدونکو چارو وزارت مطبوعاتي سلاکار حفیظ احمد میاخېل
د کډوالو او راستنېدونکو چارو وزارت مطبوعاتي سلاکار حفیظ احمد میاخېل

​نوموړی وايي:

"د کډوالو وزارت له داخلي او نړیوالو بنسټونو سره یوځای بېځایه شويو کورنیو ته بشري مرستې رسوي. له بېځایه شويو سره خوراکي او د نورو موادو مرسته کېږي. زموږ د سروېګانو ډلې همدا مهال کابل او ولایتونو کې له مؤسسو سره یوځای کور په کور ګرځي چې معلومه کړي کوم کسان د مرستو متسحق دي."

د کډوالو چارو وزارت وايي، خپلو سیمو ته د بېځایه شويو د ستنولو او ځای پر ځای کولو پر یوه پروګرام کار کوي.

د ښاغلي میاخېل په خبره د دې پروګرام له مخې د ناامنو سیمو اوسېدونکي به په نورو امن سیمو کې ځای پر ځای کېږي.

د ۲۰۱۷ میلادي کال په لومړیو درېیو میاشتو کې بېځایه شوي خلک په مجموع کې د افغانستان د ۲۲ ولایتونو اوسېدونکي دي.

ملګري ملتونه وايي، نېږدې ۶۶۱ زره کسان په تېر ۲۰۱۶ میلادي کال کې له خپلو اصلي سیمو بېځایه شوي وو.

XS
SM
MD
LG