د افغانستان د ملي امنيت سلاکار له خپل روسي سيال سره د لیدو پرمهال ويلي چې افغانستان د روسیې د هغو هڅو هرکلی کوي چې هدف يې د افغان دولت سره د سولې مذاکراتو ته د وسله والو مخالفينو هڅول دي.
د افغانستان د ملي امنيت شورا د اعلاميې له مخې، محمدحنيف اتمر نن په روسيه کې د نيکولای پيتروشوف سره خبرې وکړې.
ښاغلي پيتروشوف زیاته کړه چې له طالبانو سره د روسيې وروستي تماسونه د دې ډلې د هڅولو په خاطر وو چې له افغان حکومت سره د سولې پروسه کې يوځای شي.
د افغانستان د ملي امنيت شورا اعلاميه کې راغلي چې ښاغلي اتمر ویلي، افغانستان، روسيه سيمه کې خپل مهم ملاتړی ګڼي.
د ده په وينا افغانستان د افغان امنیتي او دفاعي ځواکونو برخه کې د مرستې، په افغانستان کې د سولې او ثبات، د مخدره موادو او ترورېزم پرضد د مبارزې برخه کې د روسیې هر اړخېزې همکارۍ ته اړتيا لري.
ښاغلی اتمر پرون مسکو ته ولاړ.
تر دې مخکې مسکو تائيد کړې چې د داعش ډلې پرضد د مبارزې لپاره يې له طالبانو سره تماسونه نيولي دي.
مخکې افغان او امريکايي چارواکو د مسکو او طالبانو پر اړيکو انتقاد کړی دی.
افغانستان کې د ناټو د غوڅ ملاتړ ماموریت عمومي قوماندان جان نيکلسن تيره هجري شمسي مياشت وويل:
"د بهرنیو لوبغاړو د نفوذ په ځانګړې توګه د پاکستان، روسیې او ايران هغه هڅو په اړه اندېښمن دی چې د یوه باثباته افغانستان جوړولو لپاره د افغان حکومت د هڅو تر پوښتنې لاندې راوستلو په خاطر د طالبانو ملاتړ او دغې ډلې ته مشروعيت ورکولو ته دوام ورکوي."
جنرال نيکلسن دغه خبرې د امريکا د سنا د نظامي خدماتو کمېټې په غونډه کې وکړې چې د افغانستان د وضعيت په اړه جوړه شوې وه.