د کندز د ښځو چارو ریاست وايي، جګړې او ناامنۍ د دې لامل شوي چې د ښځو او نارینهو تر منځ د اعتیاد ستونزه زیاته کړي.
د کندز د ښځو چارو رئیسه نصیبه هولکر ازادي راډیو ته وویل، هغه ښځې چې په مخدره موادو معتادې دي په سمه توګه د کورنۍ سرپرستي نهشي کولای.
نوموړې زیاتوي چې د کندز ولسوالیو ته دوی لاسرسی نهلري خو د ښار شااوخوا سیمو کې کابو ۶۰۰ تنه معتادې ښځې شته چې د تداوۍ لپارهیې هم هېڅ کار نهدی شوی.
اغلې هولکر زیاته کړه:
"د تخمیني ارقامو له مخې کندز کې تر ۳۰ زرو پورې په مخدره موادو معتاد دي چې ښځې او نارینه پهکې شامل دي، خو د کندز مرکز کې یوازې ۶۰۰ یا ۷۰۰ ښځې په مخدره موادو معتادې دي."
هولکر وايي، د یوې کورنۍ لپاره د نارینه اعتیاد دومره مضر نهتمامېږي لکه د یوې ښځې یا مور اعتیاد چې ټولنې او کورنۍ ته زیان اړوي.
نوموړې وايي:
"د یوې ښځې د اعتیاد څومره ضرر چې ټولنې ته رسېږي د نارینه اعتیاد ورته هغومره ضرر نهشي رسولای ځکه چې مور ماشومان روزي او که ماشومان سالم تربیه نهشي ټول ضرر یې ټولنې ته رسېږي."
د نوموړې په وینا چې د تېرو جګړو او ټولنې ته د نهپاملرنې له کبله د ښځینه معتادینو شمېر هم ورځ تر بلې مخ پر زیاتېدو دی.
په ورته وخت کې کندز کې د نشهیي توکو پر وړاندې د مبارزې رئیس عبدالبصیر مُرشد ازادي راډیو ته وویل چې دې ولایت کې د روږدو کسانو شمېر څه باندې ۳۰ زره تنو ته رسېږي.
ښاغلی مُرشد زیاتوي چې اوسمهال په دې ولایت کې د روږدو کسانو د درملنې په خاطر یو ۵۰ بستریز روغتون د کندز سیمهییز روغتون کې فعال دی، همدارنګه یو ۲۰ بستریز روغتون په قلعهزال ولسوالۍ کې جوړ شوی ځکه چې نوموړې ولسوالۍ کې د روږدو کسانو شمېره ډېره لوړه ده.
نوموړی وايي:
"څه باندې ۱۷ زره روږدي کسان قلعهزال ولسوالۍ کې موجود دي، د عامې روغتیا وزارت باید دغه جوړ شوي روغتون په دې ولسوالۍ کې فعاله کړي، څو د خلکو روغتیايي ستونزې په وخت سره په دې ولسوالۍ کې هوارې شي."
د دغو چارواکو په خبره، د قلعهزال ولسوالۍ کې تر ټولو زیات معتادین موجود دي خو د ناامنیو له امله په دغې ولسوالۍ کې د معتادینو جوړ شوی کلینیک او نور سهولتونه نهدي فعال شوي.
د سیمې خلک وايي چې ناامنیو کې د معتادینو شمېر ځکه زیاتېږي چې خلک تداوۍ ته لاسرسی نهلري او هغه کورنۍ چې اقتصاد یې کمزوری وي د لوږې د ختمولو لپاره هم له نشهیي توکو استفاده کوي.
ښاغلی مُرشد زیاتوي چې بېکاري، جنګ او ناامني، اقتصادي ستونزې او تر څنګیې مهاجرتونه دا هغه لاملونه دي چې اوسمهال دې ولایت کې یو زیات شمېر خلک په دې ناوړه او د انسانیت ضد پديدې باندې اخته شوي دي.
راپور: اجمل ارین