د لاسرسۍ وړ لېنکونه

تازه خبر
جمعه ۱۰ وری ۱۴۰۳ کابل ۰۲:۰۰

وقاد: حکومت دې حزب‎اسلامي سره د تفاهم‎لیک موادو عملي کول ګړندي کړي


د افغانستان د سولې عالي شورا او د ځینو جهادي تنظیمو استازي کابل ته د حزب‎اسلامي د مشر ګلبدین حکمتیار راتګ او له حکومت سره د حزب‎اسلامي یوځای کېدل د سولې او ثبات لپاره مهم ګڼي او له حکومته غواړي چې د دواړو لورو ترمنځ دې د شوي تفاهم‎لیک د موادو عملي کول، ګړندي کړي.

دوی دا خبرې د پنجشنبې په ورځ کابل کې د حزب‎اسلامي د مشرګلبدین حکمتیار د ۱۱۸ دیني او علمي کتابونو د پیژندګلوۍ په یوه عملي سیمینار کې وکړې.

د سولې عالي شورا غړي قاضي محمدامین وقاد وویل، کابل ته به د حکمتیار راتګ د سولې په پروسه مثبت اثر وکړي.

ده هیله وښوده چې د حکومت او حزب‎اسلامي ترمنځ د شوي تفاهم‎لیک مواد، ژر تر ژره پلي شي.

د سولې عالي شورا غړي قاضي محمدامین وقاد
د سولې عالي شورا غړي قاضي محمدامین وقاد

ښاغلي وقاد زیاته کړه:

"د افغانستان د سولې پروسه ملت، دولت او نړیوالې ټولنې تقدیر کړې اجرائیه کمېټه په‎کې اسانتیاوې برابرې کړي، هغه ۹۶ بندیان چې حکومت ته په ګوته شوي هیله ده ژر تر ژره ازاد شي. دا د حکمتیار د راتګ لپاره مقدمه ده، له دولته هیله ده چې دا پروسه ژر تر ژره سرته ورسوي."

د حزب‎اسلامي د مشر ګلبدین حکمتیار د تألیفاتو د پيژندګلوۍ په دغه علمي سمینار کې وویل شول چې ښاغلي حکمتیار د دغو کتابونو پر لیکلو څو لسیزې زیار ایستلی او محتوا "منځ‌پانګه"یې د افغاني ټولنې په ګټه ده.

د ښاغلي حکمتیار دغه تألیفات له دینه د دفاع، ټولنیزو مسایلو، اسلامي نهضت او د عدالت پر موضوعګانو راڅرخي.

په جوړ شوي علمي سیمینار کې د افغانستان د اقتصاد وزیر او د افغانستان د جمعیت اسلامي د ګوند د سیاسي کمېټې مشر عبدالستار مراد، حکمتیار یو پیاوړی جهادي او علمي شخصیت یاد کړ او هیله یې وښوده چې کابل ته د ده له راتګ سره، د سولې پروسه مؤثره او د امنیت او ښې حکومتوالی لاره کې یې عملي هڅې ولیدل شي.

د افغان حکومت او حزب‎اسلامي د سولې تفاهم‎لیک شاوخوا پنځه میاشتې مخکې د دواړو لورو له‎خوا د یو لړ شرطونو په منلو سره لاسلیک شوه.

د حکومت له زندانونو څخه د حزب‎اسلامي د بندیانو خلاصېدل، د دغه حزب د غړو زرو کورنیو ته د یوې-یوې نومرې ځمکې ورکول، د ملګرو ملتونو له تور لېسته د حکمتیار د نوم ایستل او کابل ته د حکمتیار راتګ لپاره د زمینو برابرول، د دغې تفاهم‎لیک عمده شرطونه په ګوته شوي دي.

د افغان حکومت او حزب‎اسلامي له لوري د شوي توافق‎نامې د موادو عملي کولو ته یوه کمېټه هم ګمارل شوې خو د حزب‎اسلامي د مشرتابه پلاوي ځینې غړي وايي چې حکومت د دغې تفاهم‎لیک عملي کولو ته لازمې هڅې نه‎کوي.

په ورته وخت کې د افغان حکومت چارواکي وايي، حکومت د شوي تفاهم‎لیک عملي کولو ته ژمن دی.

د افغان حکومت د اجرائیه ریاست ویاند مجیب رحیمي د پنجشنبې په ورځ کابل کې په دې اړه وویل:

د افغان حکومت د اجرائیه ریاست ویاند مجیب رحیمي
د افغان حکومت د اجرائیه ریاست ویاند مجیب رحیمي

"حکومت د توافق‎نامې په اړه، پر خپلو ژمنو ولاړ دی. مختلفې کمېټې د حزب‎اسلامي له پلاوي سره په ګډه سره کار کوي. دا کار لږ وخت غواړي، پروسه روانه ده او په پلي کولو کې یې د حکومت له‎خوا هېڅ ستونزه نشته."

حزب‎اسلامي له کابو ۴۰ کلونو راهیسې د کابل د حکومتونو د مخالفینو په ډله کې شمېرل کېږې چې ډېر ځله ېې د مرکزي حکومت پر وړاندې وسله‎وال فعالیتونه هم کړي دي.

خو د سولې عالي شورا وايي، د سولې له پروسې سره د دغه حزب یوځای کېدل، د هېواد خلکو او حکومت په ګټه دي او نورو مخالفو ډلو ته به هم لاره اواره شي چې له جنګه لاسه واخلي.

XS
SM
MD
LG