د افغانستان د ولسي جرګې د ۱۶مې دورې د اووم تقنیني کال د اداري پلاوي لپاره ټاکنې ترسره شوې.
په دغو ټاکنو کې د افغانستان د ولسي جرګې د لومړي معاونیت لپاره همایون همایون، ظاهر قدیر، میرویس یاسني او د دوهم معاونیت لپاره نذیر احمدزي او نعمتالله غفاري ځانونه کاندید کړي وو.
یوازې نذیر احمدزی د ۱۳۳ رأیو په ترلاسه کولو وتوانېد چې د دوهمې مرستیالۍ مقام ترلاسه کړي.
د لومړي منشي څوکۍ لپاره عبدالرؤف انعامي او صالح محمد سلجوقي ځانونه کاندید کړي وو چې یو هم دغه مقام ترلاسه نهشو کړی.
همدارنګه د ولسي جرګې د نایب منشي لپاره عرفانالله عرفان ځان کاندید کړی و چې له کومې سیالۍ پرتهیې دغه څوکۍ خپله کړه.
د ولسي جرګې د ټاکنو پایلې د دغې جرګې رئیس عبدالرؤف ابرهیمي داسې اعلان کړې:
"د اداري پلاوي لپاره د رأیګېرۍ په پایله کې موږ د خدای په فضل وتوانېدو چې د ولسي جرګې د دوهم معاونیت لپاره نذیر احمدزی او همدارنګه د جرګې نایب منشي لپاره عرفانالله عرفان ستاسې په رأیو وټاکو."
ټاکل شوې چې سبا به د ولسي جرګې د لومړي معاونیت او منشي لپاره بیا انتخابات ترسره شي.
د ولسي جرګې د اداري پلاوي په ټاکنو کې د رأیو د کارونې مجموعي رأیې ۲۱۸ وې چې هر کاندید باید ۱۱۰ د تائید رأیې ترلاسه کړې وی چې په هغې سره پنځوس جمع یو تکمیلېده.
په ورته وخت کې د افغانستان مشرانو جرګې هم د اداري پلاوي لپاره ټاکنې ترسره کړې چې د دغې جرګې رئیس فضلالهادي مسلمیار استاد طیب عطا د ۳۳ رأیو په ګټلو سره د جلسي د منشي په توګه اعلان کړ.
ده وویل:
"درنو سناتورانو د استاد طیب عطا ۳۳ رأیې ، ۱۱ رأیې د نجیبې حسیني، ۹ د ډاکټر رسول او څلور رأیې باطلې او ۷ رأیې سپینې دي چې جمله ۶۴ رأیې کېږي ستاسې د پرېکړې په اساس باندې استاد طیب عطا د جرګې د منشي په توګه وټاکل شو."
د افغانستان مشرانو جرګې تېره ورځ هم د اداري پلاوي لپاره ټاکنې ترسره کړې وې چې په ترڅ کې یې په دغو ټاکنو کې محمد علم ایزدیار د مشرانو جرګې د لومړي مرستیال او اصف صدیقي د دوهم مرستیال په توګه ټاکل شوي.
همدارنګه فیصل سمیع د مشرانو جرګې د منشي د مرستیال په توګه ټاکل شوی و.
په عین حال کې د حقوقي چارو یو شمېر کارپوهان په دې نظر دي چې د افغانستان د ملي شورا د اداري پلاوي په اوسنیو ټاکنو کې تر ډېره هغه کسان انتخاب شوي چې په تېر تقنیني کال کې هم د اداري پلاوي په تشکیلاتو کې وو.
افغان کارپوه محمد بصیر حقیار د سې شنبې په ورځ ازادي راډيو ته وویل چې د ملي شورا په اداري پلاوي کې نوي ټاکل شوي کسان باید د حاضرۍ تر څنګ د کمېسیونونو د کارونو لپاره هم منظمه اجنډا ولري.
نوموړي زیاته کړه:
"دوی باید په ډېر منظم ډول په مجلس کې حاضر واوسي او د حاضرۍ ترڅنګ د کمېسیونونو د کارونو په اړه هم منظمه اجنډا او پلانونه ولري، تر څو کمېسیونونه فعال پاتې شي."
نوموړي وویل چې د اداري پلاوي مسؤلیتونه د ولس په وړاندې څو چنده اضافه کېږي او باید خپلې دندې په ښه توګه ترسره کړي.
د یادونې وړ ده چې د ملي شورا د ۱۶ دورې اووم تقنیني کال تېره ورځ د افغان ولسمشر محمد اشرف غني لهخوا په رسمي توګه پرانیستل شوه.
راپور: ناجیه ساپۍ
