ارزګان کې د بشري حقونو خپلواک کمېسیون مسؤلین په دغه ولایت کې پر مدني ټولنو نیوکه کوي او وايي چې له تېرو اتو کالونو راهیسې يې د بشري حقونو د نقض برخه کې فعالیت صفر دی او هېڅ ډول لاسته راوړنه نهلري.
ارزګان کې د بشري حقونو خپلواک کمېسیون د دفتر سرپرست عبدالشکور روستايي د دوشنبې په ورځ ازادي راډیو ته وویل چې دغه ولایت کې مدني ټولنو د بشري حقونو د ساتنې او ټولنې د اصلاح کارونه شاته پرېښې او خپلو شخصي ګټو ته کار کوي.
نوموړی وايي:
"ارزګان کې له خویندو څخه پوزه، غوږونه او ان دا چې په ژوندوني سوځول کېږي، خو مدني ټولنو یې پر وړاندې خپل غږ نهدی پورته کړی، موږ نهپوهېږو چې دوی د چا لهخوا اداره کېږي او چاته کار کوي."
د مسؤلینو په خبره چې دا مهال ارزګان کې شااوخوا ۱۰ مدني ټولنې شته چې درې يې ښځینه او اووهيې نارینه دي.
بلخوا د مدني ټولنې مسؤلې بيبي مرجانې کوچۍ ازادي راډيو ته وویل:
"ماته څو ځلې د ارزګان لوړپوړو چارواکو خبرداری راکړی چې د هېڅچا غږ پورته نهکړئ، موږ څوک مظاهرې ته نهپرېږدي، د یوه غریب او بېچاره ولس غږ پورته کولو ته مو نهپرېږدي، خو زموږ غوښتنه له مرکزي ادارې دا ده چې موږ ته اجازه راکړي چې د خپلو حقونو د لاسته راوړلو لپاره مدني حرکتونه وکړو."
د اغلې کوچۍ په خبره چې د تاوتریخوالي د پېښو قربانیانو ته د عدالت غوښتنه او خلکو ته د عامه پوهاوي ورکړه د مدني بنسټونو له عمده موخو څخه ګڼل کېږي.
د مدني ټولنې مسؤل اسد پښتون هم ورته څرګندونې لري.
نوموړی وايي، ارزګان کې رسنۍ د یوه ځانګړي ټیم په واک کې دي او د بیان ازادۍ مخهیې نیولې.
ښاغلي پښتون زیاته کړه:
"موږ ارزګان کې یو ټلوېزیوني چینل نهلرو چې خپل غږ پورته کړو او یا هم خپلواکې رسنۍ، نو خود به موږ پټه خوله پاتې کېږو."
له دې ټولو سره-سره ارزګان کې د عدليې ریاست رئیس احمد خان احمدي وايي، هغه چاته به اجازه ورنهکړي چې تش په نوم مدني ټولنه جوړه کړي او د اړتیا پر مهال فعالیتونه نهکوي.
راپور: شریفالله شرافت