د بغلان د ولایتي شورا غړي فیروزالدین ایماق د طالبانو هغه ادعا تائید کړې چې وايي، د تالهوبرفک ولسوالۍ یې د افغان حکومتي له ځواکونو څخه نیولې ده.
ښاغلي ایماق ازادي راډیو ته وویل چې دا ولسوالۍ د چهارشنبې په ماسپښین د وسلهوالو طالبانو لاس ته ولوېده.
د بغلان د ولایتي شورا غړی فیروزالدین ایماق وايي:
"په داسې حال کې چې د تالهوبرفک ولسوال او امنیه قوماندان دواړه په مرکز پلخمري کې وو، طالبانو له دوو لورو پر دې ولسوالۍ برید وکړ."
د ښاغلي ایماق په وینا ولسوالۍ کې عادي امنیتي پرسونل څلور ورځې مقاومت وکړ او بالاخره د درې سرتېرو په وژلو او ۱۳ نورو سرتېرو په اسیرېدو دا ولسوالۍ د طالبانو لاس ته ورغله.
د بغلان تالهوبرفک ولسوالۍ له بامیان او پروان ولایتونو سره شریکې پولې لري او له ستراتیژیک پلوه بغلان کې یوه مهمه ولسوالۍ ګڼل کېږي.
د بغلان د ولایتي شورا غړی فیروزالدین ایماق وايي، د دې ولسوالۍ سقوط په شمال کې مېشت وسلهوال طالبان د افغانستان له جنوب سره نښلوي.
نوموړی وايي:
"مخالف وسلهوال مخکې د مرکزي بغلان له لارې د کندز له چهاردرې سره وصل و، همدارنګه کلهیې چې د دهنې غوري ولسوالۍ ونیوله نو دا لوری هم د کندز چهاردرې سره وصل شو. د تالهوبرفک په سقوط سره وسلهوال د غوربند سره وصل شول چې بالاخره له دې لارې له غزني او میدان وردګ سره تړل کېږي او د افغانستان شمال له جنوب سره وصلوي. اوس دوی کولای شي چې له جنوبه له طالبانو سره کېدونکې مرستې او اکمالات په اسانۍ د موټرو له لارې د افغانستان شمال ته انتقال کړي او له جنوبه شمال ته په تګ راتګ کې به هم د کوم خطر احساس نهکوي."
نوموړي همدارنګه وویل چې د تالهوبرفک ولسوالۍ د ډبرو د سکرو او طلا کانونه لري چې له دې پلوه د طالبانو لپاره اقتصادي اهمیت هم لري.
د بغلان د ولایتي شورا غړي فیروزالدین ایماق تور پورې کړ چې مرکزي حکومت بغلان ته وړ چارواکي نهاستوي او دا د دې سبب شوې چې د دې ولایت پراخې سیمې د طالبانو لاس ته ولوېږي.
طالبانو هم په یوه خبرپاڼه کې ادعا کړې چې د تالهوبرفک ولسوالۍ یې نیولې.
دوی همدارنګه د دې ولسوالۍ د نیولو لپاره په جګړه کې د درې پولیسو وژل کېدل او د ۱۳ نورو د اسیرېدو ادعا هم کړې.
موږ هڅه وکړه چې بغلان او پلازمېنه کابل کې د تالهوبرفک د ولسوالۍ د سقوط په اړه د لوړپوړو امنیتي چارواکو نظر واخلو خو هغوی په دې اړه له څه ویلو ډډه وکړه.
