وروسته له هغې چې بیا پاکستان کې د افغان کډوالو د نیولو او ځورولو راپورونه خپاره شول د افغانستان د بهرنیو چارو وزارت د پاکستان د پولیسو دا عمل د درې اړخیزې موافقتنامی خلاف بولي.
د دې وزارت چارواکي وایي چې د افغان حکومت، پاکستان او "یو. اېن. اېچ. سي. ار" تر منځ په دې اړه له مخکې نه درې اړخیزه توافقنامه موجوده ده.
د دغه وزارت مرستیال ویاند خیرالله ازاد د چهارشنبې په ورځ ازادي راډیو ته وویل، پاکستان باید هغه ژمنې عملي کړي چې په دې توافقنامه کې یې کړي دي.
نوموړی وايي:
"د پاکستان حکومت هغه ژمنې چې له افغان حکومت او نړیوالو سرهیې د افغان کډوالو په اړه کړي باید عملي کړي او د نړیوالو کنوانیسنونو له مخې ورسره چلند وکړي له کډوالو د وسیلې په توګه استفاده ونهکړي او زموږ غوښتنه دا ده چې پاکستان باید له افغان کډوالو سره انساني برخورد وکړي."
نېږدې درې اوونۍ وړاندې اسلاماباد کې د افغان حکومت، پاکستان او "یو. اېن. اېچ. سي. ار" تر منځ درې اړخیز تړون لاسلیک شو چې له مخې بهیې افغان کډوال په پاکستان کې نهځورول کېږي او نه به هم په زوره له دغه هېواده ایستلو ته اړ کېږي.
د افغانستان د کډوالو چارو وزارت وايي چې له تېرو درې ورځو راهیسې د پاکستان د پنجاب ایالت په راولپنډۍ ښار کې ۱۲۰ افغان کډوال پولیسو نیولي چې یو شمېر یې د افغان سفارت په مرسته بېرته ازاد شوي.
د پاکستان ډان نیوز ورځپاڼې راپور ورکوي چې د پاکستان سند کې هم د پولیسو عمومي قوماندان اعلان کړی چې ټول ایالت کې یې د افغان کډوالو پر ضد عملیات پيل کړي.
د افغانستان د ولسي جرګې د کډوالو چارو کمېسیون د پاکستان دا اقدام غندي او له افغان حکومته غواړي چې په دې اړه نړیوالې ټولنې ته شکایت وکړي.
د دغه کمېسیون غړي محمد نذیر احمدزي ازادي راډیو ته وویل چې افغان حکومت دې له خپلو امکاناتو سره برابر په خپله خوښه د افغان کډوالو د راستنولو چارې چټکې کړي.
ښاغلي احمدزي زیاته کړه:
"له افغان حکومته مو تمه دا ده چې له امکاناتو سره سم د افغان کډوالو د راستنېدو زمینه برابره کړي، که دا مسئله د افغان حکومت له توانه اوچته وي، بیا دې په پاکستان کې د افغان کډوالو د ځورولو موضوع له نړیوالې ټولنې سره شریکه کړي."
ښاغلی احمدزی زیاتوي اوس چې په پاکستان کې له افغان کډوالو سره کوم چلند کېږي، د مهاجرت له ټولو منل شویو نړیوالو قوانینو او د ګاونډیتوب له اصولو څخه څرګنده سرغړونه ده.
د افغانستان د کډوالو چارو وزارت وايي چې له اړوندو نړیوالو مرستندویو مؤسسو سره په ګډه په خپله خوښه د افغان کډوالو د راستنېدو لپاره چمتووالی نیولی.
بلخوا راستانه شوي یو شمېر افغان کډوال وايي روانې ناامنۍ، د سرپنا او کار نشتوالی، د ځمکو غصب، ښوونځیو او روغتیايي چارو ته په سمه توګه نهلاسرسی دوی ته ډېرې ستونزې جوړې کړي.
راپور: رحمتالله افغان