د بدخشان د وَردوج ولسوالۍ د یو شمېر مخورو او خلکو په وینا چې اوسمهال دغه ولسوالۍ د سیمهییزو طالبانو او د بهرنیو جنګیالیو د پلان جوړولو په امن مرکز بدل شوې ده.
د وَردوج ولسوالۍ نېږدې دوه کاله کېږي چې د وسلهوالو طالبانو په کنټرول کې ده.
د دې ولسوالۍ اوسېدونکي وايي چې اوسمهال د دې ولسوالۍ خلک له سختو اقتصادي ستونزو سره لاس او ګرېوان دي او ان یو شمېر خلک دومره توان نهلري چې د خپل کور لومړنۍ اړټیاوې پوره کړي.
د وَردوج ولسوالۍ خلک وايي چې د دې ولسوالۍ بېرته نیولو لپاره مرکزي حکومت جدې اراده نهلري.
مولوي عبدالقدیر او امامالدین د یادې ولسوالۍ د نورو خلکو په استازیتوب ازادي راډيو ته وویل:
"له هغه وخت راهیسې چې د وَردوج ولسوالۍ سقوط کړی هلته خلک له سختو ستونزو سره مخ دي، خلک د خپل ډوډۍ پیدا کولو ته حیران دي، حال دا چې د وسلهوالو مخالفینو ډوډۍ هم پرې حواله ده."
"موږ په وار-وار د دولت دروازې ته ورغلي یو چې د وَردوج ولسوالۍ تصفیه کړي او خلک چمتو دي چې له دولت سره مرسته وکړي، خو دوی موږ ته وايي چې نن عملیات پیلېږي او سبا پیلېږي."
په ورته وخت کې د وَردوج ولسوال دولت محمد خاور بیا وايي، که د پسرلي د رارسېدو نه مخکې دغه ولسوالۍ د وسله والو طالبانو له شتونه تصفیه نهشي، نو د هوا په ګرمېدو سره به د ناامنیو لمن د بدخشان نورو ولسوالیو ته هم وغځېږي.
ښاغلی خاور وايي:
"اوس غرونه واورو پوښلي او که واورې اوبه شي، نو بیا وسلهوال طالبان غرونو ته پورته کېږي او پر امنیتي ځواکونو برېدونه کوي، خو که عملیات ونهشي، نو د هوا ګرمېدو سره به د څو نورو ولسوالیو امنیت هم خراب شي."
بلخوا د بدخشان والي احمد فیصل بیکزاد وايي چې د امنیتي ځواکونو عملیاتي پلان بشپړ شوی او نېږدې ورځو کې به د دې ولایت د دوه ولسوالیو بېرته نیولو په هدف پراخ چاڼیز عملیات پیل شي.
نوموړی وايي:
"زموږ عملیاتي پلان تکمیل شوی او نېږدې راتلونکي کې د هغو ولسواليو بېرته نیولو په هدف عملیات پیلېږي چې د طالبانو په کنټرول کې دي، څو سیمه د دښمن له وجوده پاکه شي."
ښاغلی بیکزاد زیاتوي چې اوسمهال د "کوکچه ۱۱" په نوم د افغان ګډو ځواکونو چاڼیز عملیات د دې ولایت په جُرم ولسوالۍ کې جریان لري او روانو عملیاتو کې افغان ځواکونه ښې لاسته راوړنې هم لري.
د یادونې وړ ده کابو دوه کاله کېږي چې د بدخشان دوه ولسوالۍ وَردوج او یُمګان د وسلهوالو مخالفینو او بهرنیو جنګیالیو په اداره کې دي، خو د دغو ولسوالیو خلک له مرکزي حکومته غواړي چې د دغو دوه ولسوالیو د بېرته نیولو برخه کې کوټلي ګامونه پورته کړي، څو خلک خپلو سیمو کې په یوه ارامه فضا کې ژوند وکړي.
راپور: اجمل ارین