د اروپايي پارلمان یو پلاوی چې د لومړي ځل لپاره کابل ته راغلې ټینګار کوي چې د سولې یوه ریښتنې پروسه باید یوازې پر مرکز متمرکز نهوي بلکه د هېواد ټولو برخو ته پهکې ونډه ورکړل شي.
د دغه پلاوي غړي پیټرس استریوس د پنجشنبې په ورځ رسنیو سره خبرو کې د افغان حکومت او حزباسلامي ترمنځ د سولې له هوکړې هرکلی وکړ او ویې ویل چې دغه لړۍ باید دوام پیدا کړي.
ښاغلي پیترس وايي، د سولې پروسه کې باید ټولو قومونو، مدني ټولنو او ښځو ته ونډه ورکړل شي.
نوموړي زیاته کړه:
"موږ د افغانستان د روان وضعیت پیچلتیا درکولای شو، موږ په دې باور یو چې د سولې لپاره لومړی ګام ډېر ښه وو او دا باید دوام پیدا کړي. د سولې یوه ریښتنې پروسه چې پهکې مختلف قومونه، ګروپونه او ښځې پهکې ګډون ولري باید یوازې پر مرکز متمرکز نهوي بلکه د نورو ولایتونو ونډه هم پهکې ډېره مهمه ده."
دغه پلاوی وايي چې اروپايي ټولنه به له افغانستان سره پر خپلو کړو ژمنو ولاړ اوسي او د دغه هېواد ملاتړ ته به دوام ورکوي.
له دې وړاندې افغانستان کې د اروپايي ټولنې سفیر ویلي و چې افغانستان کې د سولې او پخلاینې لپاره فرصتونه موجود دي چې باید ورڅخه استفاده وشي.
فرانس مایکل مېلېبن ویلي چې دغه هېواد کې د روغې جوړې لپاره د تېرو ټولو ۱۰ کلونو په پرتله یوازې په تېر یو نیم کال کې هڅې شوي دي او د حزباسلامي سره د سولې تفاهملیک لاسلیکېدل د دې ښکارندوینه کوي چې افغانستان کې سوله ممکنه ده.
دا په داسې حال کې ده چې افغان حکومت شاوخوا څلور میاشتې وړاندې د جګړې له یوې ښکېلې ډلې حزباسلامي سره د سولې تفاهملیک لاسلیک کړ.
هاخوا د افغانستان د سولې عالي شورا بیا وايي چې د سولې په روانه لړۍ کې د افغانستان ټولو قشرونو ته ونډه ورکړل شوی.
د دغه شورا د نړیوالو اړیکو سلاکار محمد اسماعیل قاسمیار وايي، د سولې عالي شورا تل په دې هڅه کې دې چې په دغه لړۍ کې د ټولو افغانانو له نظریاتو او سلامشورو څخه ګټه پورته کړي.
نوموړی وايي:
"موږ د هېواد په ۳۳ ولایتونو کې ولایتي کمېټې پرانیستلي څو له هغو مخورو څخه استفاده وکړو چې په یو ډول سره مقابل لوري سره کولای شي اړیکه ونیسي. د ښځو، ځوانانو، مخورو او قومي مشرانو ونډې ته تل پام شوې."
افغان حکومت که څه هم تل ټینګار کوي چې د سولې دروازه د ټولو وسلهوالو مخالفینو پر وړاندې پرانیستې ده خو د حکومت اجرائیه ریاست وايي، ترهغه چې یو شمېر دولتونه د وسلهوال طالبان له ملاتړه لاس وانهخلي سوله ناشونې ده .
د اجرائیه ریاست د ویاند مرستیال جاوید فیصل د پنجشنبې په ورځ خبریالانو ته وویل، وسلهوال طالبان نهشي کولای چې له یوې خوا جګړه وکړي او له بلې خوا سولې ته ور ودانګي.
د ښاغلي فیصل په خبره که وسلهوال طالبان سوله غواړي نو له جګړې څخه دې لاس واخلي.
یو شمېر افغان کارپوهان بیا په دې باور دي چې ګاونډي هېوادونه هېڅکله په افغانستان کې سوله نه غواړي.
سیاسي کارپوه اصف بکتاش وايي، افغانان له هرڅه نه زیات سولې ته اړتیا لري نو ځکه باید له هر بل وخت په پرتله اوس سره یو شي او پری نهږدي چې افغانستان د نورو هېوادونو د نیابتي رقابتونو پر ډګر بدل شي.
راپور : عبادالله حنان زی