د سوریې د کړکېچ د هواري په هدف د استانې تر غونډې یوه اوونۍ وروسته په ژنیو کې په همدې هدف نننۍ ناسته په داسې حال کې جوړېږي چې د سوریې د سیاسي راتلونکې د یوې حل لارې د موندلو هیلې کمرنګې بلل شوي دي.
پرون ژنیو ته د سوریې د رژیم د مخالفینو د استازیو تر رسېدو وروسته د سوریې لپاره د ملګرو ملتونو ځانګړي استازي سټیفن ډیمیسټورا "Staffan de Mistura" وویل چې سولې ته د رسېدو امکان محدود دی.
"موږ به جدي هڅه وکړو. لکه څنګه چې پوهېږئ دا د ژنیو د خبرو څلورم دور دی او داسې وخت ترسره کېږي چې موږ غواړو د سوریې خلکو او په سوریه کې ښکېلو خواوو ته فرصت ورکړو چې له جنګ ور هاخوا هدفمندې خبرې وکړي."
د ژنیو د سولې د دې دور خبرو لپاره په ملګرو ملتونو کې د روسیې سفیر بشر الجعفري "Bashar al-Jaafari" د رژیم استازیتوب کوي.
د مخالفینو استازیتوب ډاکټر ناصرالحریري "Nasr al-Hariri" او حقوقپوه محمد صبرا "Mohammad Sabra" په غاړه لري.
د سوریې د کړکېچ د هواري په هدف په ژنیو کې وروستۍ ناسته ۱۰ میاشتې مخکې شوې وه.
د سوریې د کړکېچ د هواري په هدف د ژنیو د سولې خبرې په داسې حال کې ترسره کېږي چې روسیې د بشار الاسد له رژیمه غوښتي چې د یادې غونډې پر مهال په مخالفینو بمباري بنده کړې.
روسیې دا چمتوالی هم ښودلی چې په سوریه کې د خوندي ساحو د رامنځته کولو په خاطر له امریکا سره خبرې وکړي.
روسیې ویلي، دا ډول پروګرامونه باید د سوریې له حکومت سره په همغږي کې تنظیم شي.
د روسیې د بهرنیو چارو وزیر سرګي لاوروف د چهارشنبې په ورځ په مسکو کې خبریالانو ته وویل چې تېره اوونۍ یې د امریکا د بهرنیو چارو له وزیر ریکس ټیلرسن سره په همدې موضوع واضح خبرې کړي دي.
ښاغلي لاوروف ویلي، ټیلرسن په ځواب کې وویل چې په دې مسئلې غور دوام لري.
په سوریه کې د خوندي ساحو د رامنځته کولو مسئله د امریکا متحده ایالتونو جمهور رئیس ډونالډ ټرمپ تېره میاشت راپورته کړه او ویې ویل چې امریکا ته د کډوال کېدو پرځای په سوریه کې خلکو ته خوندي ساحي رامنځته کوي چې په خپل هېواد کې مېشت شي.
جګړو چې د سوریې نیمايي برخه نفوس بې کوره او کډوال کړی له ۲۰۱۱ میلادي کال راهیسې څلور لکه کسان وژلي لا هم د دغه هېواد په ګوټ ګوټ خوره ده او نړیوال یې په هواري نه دي بریالي شوي.
ملګري ملتونه او عربلیګ وايي، له ۲۰۱۱میلادي کال راهیسې ۴ لکه کسان په سوریه کې وژل شوي دي.
د سوریې د پالیسي تحقیقاتي مرکز بیا دا شمېر څلور لکه اویا زره یادوي خو د سوریې د بشري حقونو لندن مېشته ډله د وژل شوېو کسانو شمېر د ۳۱۰ زره او ۴۳۷ زرو تر منځ بولي.
صفي الله ستانکزی