د ارزګان سیمهییز امنیتي چارواکي وايي، دغه ولایتيې د سقوط له ګواښ څخه ژغورلی دی او امنیتي وضعیت عادي حالت ته راګرځېدلی دی.
په ارزګان ولایت کې د ملي اردو د څلورمې پلې لوا قوماندان برید جنرال غلام حضرت کاکړ د پنجشنبې په ورځ ازادي راډیو ته وویل چې ارزګان ولایت کې د «شفق ۲» عملیاتو پر مهال چې له تېرو دوو میاشتو راهیسې پیل شوی ۶۹۶ وسلهوال طالبان وژل شوي، ۳۳۷ ټپیان او همدارنګه ۹ کسه ژوندي نیول شوي دي.
د ده په خبره چې ۱۴ میله سپکې او درنې وسلې هم امنیتي ځواکونو ته په لاس ورغلي چې ۲۰ موټرونه او ۶۷ موټر سایکلونهیې لهمنځه تللي او همدارنګه ۴۴۷ کړۍ ماینونهیې کشف او خنثی شوي.
ښاغلي کاکړ زیاته کړه:
"زموږ عملیات اوس هم ارزګان کې د وسلهوالو طالبانو د ځپلو په هدف روان دي، موږ به تر هغه په دغه ولایت کې عملیات روان وساتو څو ارزګان له وسلهوالو تصفیه شي همدرانګه زه پر طالبانو غږ کوم چې د سولې لاره خپله کړي."
که څه هم افغان امنیتي ځواکونه په دغه ولایت کې هره ورځ د پرمختګ خبر ورکوي خو د مسؤلینو په خبره چې لا اوس هم دغلته د جګړې ډګر تود دی او وسلهوالو طالبانو د ولایت مقام او امنیه قوماندانۍ ودانیو ته په یو کېلومترۍ کې شتون لري.
په ورته وخت کې د ارزګان د ولایتي شورا مسؤلین هم د افغان امنیتي ځواکونو پرمختګ ستايي.
د ارزګان د ولایتي شورا مرستیال نور محمد حقمل وايي چې د ارزګان مرکز ترینکوټ او ولسوالېو امنیتي وضعیت اوس تېرو شپږو میاشتو ته په کتو ښه شوی او هغه وېره نهلري چې ګنې د ترینکوټ ښار به د وسلهوالو طالبانو لاسته ولوېږي.
نوموړي له دولته غوښتنه وکړه چې د ارزګان مرکز ترینکوټ او ولسوالیو تر منځ د لارو د خلاصون لپاره هم کوټلي ګامونه واخلي.
ښاغلي حقمل زیاته کړه:
"زه د خپل امنیتي ځواکونو څخه ډېر خوشحاله یم چې بیا هم په دومره کمو امکاناتو سره وتوانېدل چې د ترینکوټ ښار يې د هېواد له دښمنانو خوندي کړی."
په ولسي جرګه کې د ارزګان د خلکو استازی عبیدالله بارکزی هم ورته څرګندونې لري.
ښاغلی بارکزی وايي:
"زما له مرکزي حکومته غوښتنه دا ده چې ارزګان ته جدي پاملرنه وکړي، که هوا ګرمه شي ارزګان به یو ځل بیا د سقوط له ګواښ سره مخ شي، نو امنیتي ځواکونه باید مخکې له مخکې چمتووالی ولري او سیمې دې ډېرې تصفیه کړي."
له دې ټولو سره-سره د نظامي چارو کارپوهان بیا وايي چې افغان امنیتي ځواکونه باید په خپل منځ همغږي زیاته کړي.
د نظامي چارو کارپوه عتیقالله امرخېل څو ورځې وړاندې ازادي راډیو ته ویلي و چې افغان امنیتي ځواکونه په خپل منځ کې پوره همغږي نهلري نو ځکه د پام وړ پرمختګ نهشي کولای.
دا په داسې حال کې ده چې دوه ورځې وړاندې مل پاسوال غلام فاروق سنګري د ارزګان لپاره د نوي امنیه قوماندان په توګه وټاکل شو.
راپور: شریفالله شرافت