د امریکا نوی ولسمشر وایي، تُندلاري د مذهبي ازادیو په وړاندې یو اساسي ګواښ دی او ژمنه یې وکړه چې دا ګواښ به له منځه وړي.
ډونالډ ټرمپ پرون په واشنګټن کې په خپله یوه وینا کې وویل چې نړۍ د مذهبي اقلیتونو په وړاندې د یوې لویې سطح تاوتریخوالي شاهده ده.
ټرمپ ویلي، دغه زور زیاتی چې د دین او مذهب په نوم کېږي، باید لهمنځه یوړل شي.
ولسمشر ټرمپ په ځانګړي ډول په امریکا کې د مذهبي آزادۍ د دفاع ژمنه وکړه.
نوموړي وویل:
"امریکا باید تل یوه زغم لرونکې ټولنه پاتې شي،داسې ځای چې ټولو ادیانو ته پهکې درناوی وشي او داسې ځای چې زموږ ټول وګړي پهکې د خوندیتوب او امنیت احساس وکړي."
د ډونالډ ټرمپ په مشري د امریکا نوې اداره د وروستۍ پریکړې له کبله چې هغه هېواد ته یې د اوو اسلامي هېوادونو پر وګړو د ورتګ بندیز ولګاوه، تر سختو انتقادونو لاندې راغله.
د ولسمشر ټرمپ د اجرائیه فرمان له مخې د ایران، عراق، سوریې، سوډان، یمن، لیبیا او سومالیا وګړي نهشي کولای امریکا ته ولاړ شي.
د دې اجرائیه فرمان منتقدین ادعا کوي چې د دغو کسانو ممنوعیت د دین پر اساس شوی دی، خو ډونالډ ټرمپ یو ځل بیا لهدې فرمان دفاع وکړه او وایي چې هدف په سرحدونو کې د کنټرول او ارزونې ډېروالی دی.
دی وایي، امریکا ته د خلکو د ورتګ برخه کې د دغه هېواد له سخاوت څخه ناسمه ګټه اخېستل شوې ده.
ډونالډ ټرمپ وايي:
"څو راتلونکو ورځو کې موږ یو سیسټم پیلوو څو ډاډ ترلاسه شي هغه کسان چې زموږ هېواد ته ننوځي، زموږ شخصي او مذهبي ازادۍ او ارزښتونه په بشپړ ډول مني او هر ډول ظلم او تبعیض منع کوي. موږ غواړو چې خلک زموږ هېواد ته راشي، خو موږ غواړو دغه خلک زموږ ارزښتونو ته درناوی وکړي او له موږه کرکه ونهلري."
د امریکا ولسمشر وویل چې نړۍ په ستونزو کې راګیر ده او د هغو ستونزو په هواري کې هڅه کوي.