د افغانستان دفاع وزارت وایي، د وسلهوالو طالبانو په لاس د هغو وسلو په اړه به پلټنه وکړې چې روسي او ایراني مارکونه لري.
د دغه وزارت مسؤلین په دې اړه چې ګواکې وسلهوال طالبان روسي او ایران ساخت وسلې لري ادعا کوي چې طالبان ښايي د دغو دوو هېوادونو سره د افغانستان د اړیکو د خرابولو په هدف له ازادو بازارونو څخه پېرل شوې وسلې مارک کړې وي.
د دغه وزارت ویاند دولت وزیري د سې شنبې په ورځ ازادي راډیو ته وویل چې دغه موضوع ډېره حساسه ده او حکومت بهيې په اړه دقیقه پلټنه او څېړنه وکړي.
نوموړی وايي:
"د افغانستان حکومت دې برخه کې دقیقه څېړنه کوي څو دا په ډاګه شي چې دوی په رښتیا هم روسي وسلې لري او د روسیې لهخوا ورکول شوي او که نه؟ روسي ساخت وسلې او یا ایراني مارکونه په ازادو بازارونو کې هم پلورل کېږي، که طالبان وغواړي د افغانستان اړیکې له ایران، روسيې او نورو ګاونډیانو سره خرابې کړي کولای شي چې له ازادو بازارونو څخه د روسیې او ایران مارکونو سره وسلې وپېري."
ښاغلي وزیري زیاته کړه، روسيې او ایران تل ویلي چې له وسلهوالو طالبانو سره مالي مرسته نهکوي او که دا ثابته شوه چې دا دوه هېوادونه وسلهوال طالبان تمویل او تجهزوي په هغه صورت کې به حکومت په ځانګړي ډول دې برخه کې خپل دریځ له رسنیو سره شریک کړي.
د ښاغلي وزیري په خبره په افغانستان کې د وسلهوالو مخالفینو سره مرسته که د هر هېواد له لوري چې وي د سیمې په ګټه نهده.
دغه څرګندونې داسې مهال کېږي چې د فراه ولایت امنیتي مسؤلینو د دوشنبې په ورځ ویلي چې وسلهوال طالبان اوسمهال په پرمختللو وسلو سمبال دي چې اکثرهیې روسي دي.
د فراه والي محمد اصف ننګ هم ویلي چې تر دې دمه څرګنده نهده چې دغه وسلې په څه ډول د وسلهوالو طالبانو لاس ته ورغلي خو ډاډه دی چې د سیمې یو شمېر هېوادونه په دې برخه کې لاس لري.
دا لومړی ځل نهدی چې له وسلهوالو طالبانو سره د روسيې او ایران د مرستو په اړه څرګندونې کېږي، بلکې په دې وروستیو کې څو ځلي د افغانستان د لوېديځو ولایتونو څځه داسې راپورونه خپاره شوي چې دغه دوه هېوادونه له طالبانو سره نېږدې اړیکې لري.
په ولسي جرګه کې د فراه ولایت استازي حمیرا ایوبي هم ازادي راډیو ته وویل چې وسلهوال طالبان په پرمختللو روسي او ایراني وسلو سمبال دي او دا کار په ښکاره د افغانستان په کورنیو چارو کې لاسوهنه ده.
اغلې ایوبي زیاته کړه:
"بدبختانه دوی په پرمختللو روسي او ایراني وسلو او تجهیزاتو سمبال دي له دې څخه معلومېږي چې روسیه او ایران په مستقیم ډول د افغانستان په مسئلو کې دخیل دي."
د ملي شورا یو شمېر غړو څو ځلي ویلي چې روسیه او ایران کوښښ کوي څو له وسلهوالو طالبانو څخه په ګټې افغانستان کې داعش لهمنځه یوسي.
یو شمېر روسي چارواکو هم له وسلهوالو سره خپلې اړیکې تائید کړې وې، خو مسکو او ایران ویلي و چې له وسلهوالو طالبانو سرهیې هېڅ ډول مالي او تخنیکې مرستې نهدي کړي.
په ورته وخت کې د پوځي چارو شنونکي عتیقالله امرخېل ازادي راډیو ته وویل، که افغان حکومت په همدې اړه د سیمې د هېوادونو سره یوځای جدي اقدام ونهکړي له سختو ستونزو سره به مخ شي.
راپور: سباوون کاکړ