امریکا ته د اوو اسلامي هېوادونو د وګړو پر ورتګ د مؤقتي بندیز په غبرګون کې د اسلامي هېوادونو د همکارۍ سازمان ویلي، دا ډول اقدامات یوازې د تُندلارۍ او ترورېزم د پیاوړي کېدو سره مرسته کولای شي.
دغه سازمان چې ۵۷ هېوادونهیې غړیتوب لري اندېښنه لري چې په اوسنیو حساسو حالاتو کې د ټرمپ غوښتنې د تاوتریخوالي لمبې نورې هم پراخوي.
د امریکا ولسمشر ډونالد ټرمپ د جنورۍ پر ۲۷مه یو اجرائیه فرمان لاسلیک کړ چې له مخې یې د امریکا د کډوالۍ ټول پروګرامونه د ۱۲۰ ورځو لپاره ځنډول شوي، د سوریې پر وګړو نامحدود بندیز لګول شوی او د نورو اوو اسلامي هېوادونو پر وګړو یې د درېیو میاشتو لپاره د ویزې بندیز ولګاوه.
ټرمپ وایي، د دې اقدام هدف دا دی چې له بهرنیو ترورېستانو څخه خپل هېواد خوندي کړي. په دغو هېوادونو کې ایران، عراق، لیبیا، سومالیا، سوریه، سوډان او یمن شامل دي.
دا ټول د اسلامي همکاریو د سازمان غړي دي.
د پاکستان د بهرنیو چارو وزیر وایي، د ډونالد ټرمپ دغه اقدام به د ترورېزم په وړاندې د مبارزې نړیوال اتحاد زیانمن کړي او ښایي له ترهګرو سره مرسته وکړي چې خپلو اهدافو ته ورسېږي.
چوهدري نثار علي خان د دوشنبې په ورځ دغهراز ویلي چې له اسلام سره د ترورېزم تړل منصفانه نهدی.
دی زیاتوي چې یوازې سلګونه ګمراه شوي کسان چې نړۍ ته د اسلام ناسم پیغام ورکوي، د نړۍ د یو نیم میلیارد مسلمانانو استازیتوب نهکوي.
چوهدري نثار علي خان وایي، د ډونالد ټرمپ د کډوالۍ ضد اقدام د ترورېزم د قربانیانو درد لا ډېروي.
د عراق پارلمان هم د امریکا د وګړو په وړاندې د باالمثل عمل غوښتنه کړې ده.
د عراق د بهرنیو چارو وزارت د یوې اعلامیې په خپرولو سره پر امریکا غږ کړی چې پر عراقي وګړو پر بندیز له سره غور وکړي.
د یمن حکومت هم د ټرمپ د دې فرمان په وړاندې ناخوښي ښودلې او وایي، دا کار به ښایي د تُندلارو دریځ پیاوړی کړي.
د یمن چارواکي وایي، د ترورېزم په وړاندې د مبارزې د بریالیتوب یوازنۍ لار، خبرې دي نه د دېوالونو او خنډونو جوړول.
د جرمني صدراعظمې انګلا مېرکل وایي، د امریکا دا حرکت له کډوالو سره د مرستې له نړیوالو اساساتو پر خلاف دی.
په همدې حال کې د اروپایي کمېسیون ویاند مارګریت سکي ناس د دوشنبې په ورځ بروکسل کې یوې خبري غونډې ته ویلي:
"دا اروپایي ټولنه ده او په اروپایي ټولنې کې موږ د ملیت، نژاد یا مذهب پر اساس تبعیض نهکوو، نهیوازې د کډوالۍ برخه کې بلکه زموږ په ټولو نورو پالېسیو کې هم."
د سویډن د بهرنیو چارو وزیرې مارګوت والسټورم پر خپله فېسبوک پاڼه کي لیکلي چې د امریکا دا پرېکړه د خلکو تر منځ بېباوري او نفرت ډېروي.
دا وایي، د امریکا په ګډون ټول هېوادونه مکلفیت لري چې له تاوتریخوالي تښتېدلي کسانو سره مرسته وکړي.
په همدې حال کې ولسمشر ټرمپ د دغه دریځ دفاع کړې او وایي، ویزې به بېرته خلاصې شي خو هغه مهال چې تر ټولو خوندي پالېسۍ پر ځای شي.
ولسمشر ټرمپ د جنورۍ پر ۲۹مه په یوې اعلامیه کې وضاحت ورکړی او وایي، دا بندیز لکه څنګه چې رسنۍ یې راپورونه خپروي، د مسلمانانو په وړاندې نه بلکې د ترورېستانو په وړاندې دی.
