د امن غوښتلو دغه نارې "د امن د ټینګښت لپاره دې د باچا خان د عدم تشدد تګلاره خپره او عملي کړل شي" د عوامي نېشنل ګوند غړي او مشران او د عبدالغفار "باچا خان بابا" پلویان په هغه امن لاریون کې وهي چې هدفیې په سیمه کې امن او د باچا خان د عدم تشدد تګلارې خپرول وو.
دغه امن لاریون چې د دوشنبې په ورځ د باچا خان د تلین په مناسبت د پېښور پرېس کلب نه تر ولایت مقام "ګورنر هاوس" پورې وشو او د عوامي نېشنل ګوند مشرانو، پلویانو او ګڼ شمېر خلکو پهکې ګډون کړی و، له حکومته وغوښتل چې په سیمه کې دې د سولې د ټینګښت لپاره د باچا خان بابا د عدم تشدد تګلاره او د هغه فکر خپور او عملي کړي.
دغه لاریون ته د عوامي نېشنل ګوند ځینو مشرانو ویناوې هم وکړې او له حکومتهیې وغوښتل چې په سیمه کې دې د سولې د ټینګښت لپاره جدي اقدامات وکړي.
د عوامي نېشنل ګوند مرکزي سکرتر میا افتخارحسین په دغه لاریون کې له رسنیو سره په خبرو کې د سیمې د امن لپاره د افغانستان او پاکستان ښې اړیکې مهمې وبللې او د دواړو تر منځ د خپلمنځي تړون پر پیاوړي کېدو یې ټینګار وکړ.
نوموړي همدا شان له خپل حکومته وغوښتل چې خپله داخله او خارجه پالېسي دې د خپلو ولسونو د ګټې لپاره جوړه کړي، نه د نړېوالو د ګټې لپاره.
نوموړی په دې اړه وايي:
"امن به هغه وخت راځي چې د افغانستان او پاکستان خپلو کې ورورولي وي. په خټه یو یوو، په وینه یو یوو، په ثقافت یو یوو، په تهذیب یو یوو، نو چې موږ یو نهیوو، نو د روس، د چین او امریکا د وجې زموږ امن راتلای نهشي. کله چې پاکستان او افغانستان یو وي، نو چا تهیې اړتیا نهشته. لهذا دا زموږ یو پیغام دی او د امن په مارچ باندې موږ وايو چې زموږ مشران داخله او خارجه پالېسي د قوم د مفادو لپاره جوړه کړي، د بینالاقوامي مفادو لپاره دې نهجوړوي."
په دغه لاریون کې د باچا خان تعليمي مرکز او د باچا خان د فکر د خپرولو د ټولنې مشر ډاکتر خادم حسین وویل چې په سیمه کې د جنګ، کرکې او نفرت لهمنځه وړلو لپاره به د امن د مبارز د سوچ خپرولو دغه هلې ځلې تر یوې اوونۍ پورې دوام ولري.
نوموړی وايي:
"دا خاوره او دا وطن، دا د مینې، امن او اقتصادي ترقۍ مرکز پاتې شوی دی، دا یو تهذیب لري، یو تاریخ لري او د تېرو څو لسیزو نه چې څنګه د جنګ، اقتصاد، کرکه او نفرت دلته خپور کړل شوي دي، د هغې پر ضد د باچا خان دغه مفکوره مخې ته راوړلی شي چې د دې هېواد او د سیمې د هېوادونو واکدارانو هم له دې خبر شي چې دا خلک دا وطن او د دې وګړي امن غواړي، ترقي غواړي، پرمختګ غواړي او یو بل سره تړون غواړي."
په دغه لاریون کې د عوامي نېشنل ګوند پر مشرانو او پلویانو سربېره د مدني ټولنو ګڼ شمېر غړو او عام ولس هم ګډون کړی و.
مدني فعاله ثنا ګلزار، پر حکومتي ادارو غږ کوي چې په سیمه کې د امن لپاره دې د ټولو هغو ترهګرو ډلو پر ضد عملیات وکړي چې سولې او ثبات تهیې زیان رسولی دی.
د یادونې وړ ده چې عوامي نېشنل ګوند هر کال د عبدالغفار خان باچا خان بابا د تلین په مناسبت په پېښور او د خېبر پښتونخوا په نورو سیمو کې غونډې او امن لاریونونه کوي او دا لړۍ لا هم روانه ده.
راپور: ذبیح مومند