د افغان نجونو لومړنی ارکستر د جمعې په ورځ په سویس کې کنسرټ اجرا کوي.
دا ارکستر چې نګینه خپلواکیې مشره ده د نړۍ د اقتصادي غونډې په پای کې د شااوخوا درې زره کسانو په وړاندې یو ساعت د موسیقي الات غږوي.
د افغان نجونو لومړنی ارکستر به د جمعې په ورځ د سویس هېواد په داووس ښار کې د نړۍ د اقتصادي غونډې په پای ورځ افغاني موسیقي وغږوي.
په دغه ارکستر کې ۳۵ نجونې چې عمرونهیې د ۱۳ او ۲۰ کلونو تر منځ دي د موسیقۍ الات غږوي.
نګینې خپلواک چې د دې ارکستر مشره ده فرانس پرېس اژانس ته ویلي، د دې لپاره چې هغه د افغانستان د موسیقي په ملي انسټېټیوټ کې شامله شي پلار یې په کونړ کې د ټولو خپلوانو په وړاندې ودرېد.
تمه ده د نګینې هیلې چې ویلي یې دي غواړي په نړیوالو تالارونو کې ارکستر اداره کړي د جمعې په ورځ حقیقت ومومي.
د سویس په داووس ښار کې دغه یو ساعته ارکستر نندارې ته به د نړۍ د بېلابېلو هېوادونو او نړیوالو سازمانونو شااوخوا درې زره مشران ناست وي.
د افغانستان د موسیقۍ ملي انسټېټیوت د زهرې په نوم د افغان نجونو دا لومړنی ارکستر رامنځته کړی دی.
د دغه انسټېټیوټ رئیس احمد ناصر سرمست اروپا ته د افغان هنرمندو نجونو د راتګ او د نړۍ په اقتصادي غونډه کې د هغوی د اجرا په اړه ازادي راډیو ته داسې وویل:
"سږ کال د افغان نجونو ارکستر وبلل شو څو د نړۍ د اقتصادي غونډې په وروستۍ ورځ د سویس په داووس ښار کې یو ساعته کنسرټ ترسره کړی، له هغې وروسته به د افغان نجونو اروپايي سفر «د موسیقي کنسرټونه» پیل شي چې له داووس به زوریخ ته ځي، بیا به ژنیو ته هم ولاړ شي او کنسټرونه به ولري، له سویس وروسته د جرمني په برلین او وایمر ښارونو کې هم کنسټرونه جوړېږي."
د افغانستان د موسیقي د ودې لپاره ناصر سرمست زیات کارونه کړي او د همدې هڅو په خاطر په ۱۳۹۱ کال کې د ازادي راډیو د کال غوره شخصیت وټاکل شو.
هغه ته په دې وروستیو کې هم د ژوندۍ اجرا د هنرونو د نړیوالۍ ټولنې لهخوا جایزه ورکړل شوه.
د افغانستان د موسیقۍ په ملي انسټېټیوټ کې یتیم او بېکوره ماشومانو او وړو نجونو ته د موسیقۍ فني او مسلکي درسونه ورښودل کېږي.
د یاد انسټېټیوټ رئیس ښاغلی سرمست د افغان نجونو د لومړني ارکستر جوړېدل په افغانستان کې د یوه انقلاب په توګه یادوي او لویه لاسته راوړنهیې بولي.
نوموړي زیاته کړه:
"د افغان نجونو د ارکستر جوړول یوازې د افغانستان لپاره یو انقلاب او لاسته راوړنه نهده بلکې د اسلامي هېوادونو په خاصه توګه ګاونډيو هېوادونو لپاره یوه مثبته بېلګه ده."
ښاغلی سرمست وايي کومې نجونې چې د افغان نجونو د ارکستر «زهره ارکستر» کې د موسیقۍ الات غږوي د افغانستان غوره استازې دي چې کولای شي له دغه هېواده د نړیوالو درک او لیدلوری بدل کړي.
راپور: صفيالله ستانکزی