داعش وسلهوالو د ننګرهار په هسکې مېنې ولسوالۍ کې دیارلس تنه علما برمته کړي.
د ننګرهار ولایتي چارواکي وايي، داعش وسلهوالو په هسکې مېنې ولسوالۍ کې ۱۳ تنه ديني علماء له ځانه سره بيولي دي.
د ولایت ویاند عطالله خوګيآڼی وايي، د یکشنبې په ورځ شاوخوا نهه بجې د هسکې مېنې ولسوالۍ د شپولې سیمې اړوند د مشر ملا صیب په مدرسه کې ازموينه اخیستل کېده چې داعش وسلهوالو ۱۳ تنه ديني علماء چې په یاده مدرسه کې استادان و له ځانه سره بيولي دي.
نوموړی وايي، ولايتي ادارې د یادو علماو د راخوشې کېدو په موخه هر اړخیزې هڅې پيل کړي.
داعش وسلهوالو تر اوسه د دې پېښې په تړاو رسنیو ته څه نهدي ویلي.