په فراه کې د قطر عربانو ته یو شمېر مدني فعالان اندیښنه لري. د قطر د عربانو شل کسیزه ډله د سې شنبې په ورځ دغه ولایت ته ورسېده.
د دوی مشر شیخ علي بن عبدالله رسنیو ته وویل چې دوی له افغانستان سره د مرستې لپاره راغلي دي.
نوموړي وویل:
"افغانستان زموږ ورور هېواد دی، موږ به دلته جوماتونه، ښوونځي او روغتونونه جوړ کړو او د کرنې او مالدارۍ برخه کې به له افغانانو سره مرستې وکړو، دا زموږ د راتګ هدف دی."
دا درېیم کال دی چې د ژمي په وخت د قطر عربان فراه ته ځي.
د فراه یو شمېر اوسیدونکي وایي چې دغه عربان یو ډول نایابه مرغان ښکار کوي خو د فراه د والي ویاند ناصر مهري ازادي راډیو ته وویل چې دغه عربان یوازې د رغاونې کارونه کوي.