له پاکستان څخه کندهار ته د افغان کډوالو راستانه شوي سلګونه کورنۍ له دولت څخه کور او کار غواړي.
له پاکستان څخه کندهار ته هره ورځ په اوسط ډول د ۵۰ څخه تر شپېتو کورنۍ راځي.
دغه تازه راستنېدونکي کورنۍ وايي، که په پاکستان کې له ډول-ډول ستونزو سره مخ وه نو دلته هم بېستونزو نهدي پاتې.
راغلي کډوال وايي، په پاکستان کې د هغه هېواد پولیسو ځورولي او کډې کولو تهيې مجبور کړي.
په تېرو شپږو میاشتو کي له پاکستانه کندهار ته شاوخوا ۱۴۰۰ کورنۍ راغلي، دوی چې د ډېرو اقتصادي ستونزو سره مخامخ دي له دولته د سر پناه لپاره کور او کار غواړي.
دوی وايي:
"موږ یو ځمکه او جایداد غواړو هېڅ سرپناه نهلرو د خدای روی ته وګورئ پر دې کونډو او یتیمانو رحم وکړئ."
د کندهار په سپینبولدک ولسوالۍ کې د پاکستان سره پر پوله د کډوالو د نړیوال سازمان یا "آی. او. اېم" دفتر له تازه راستنېدونکو کډوالو سره لومړنۍ مرستې کوي.
د دغې ادارې سیمهییز مشر محمد وايي چې په تېرو شپږو میاشتو کې دغه ادارې د پنځه زره کسانو سره نغدي او د خوراکي او غیر خوراکي موادو مرسته کړې.
د کندهار په سپینبولدک ولسوالۍ کې مو د کډوالو چارو ریاست د استازي علي محمد سره د کډوالو د سرپناه د ستونزې په اړه خبرې وکړې هغه وايي چې د راستنېدونکو کورنيو د سرپنا لپاره به ډېر ژر هغوی ته د مهاجرينو په ښارګوټي کې ځمکې ورکړي.
خو ویل کېږي چې لا هم د دغه ښارګوټي تخنیکې چارې بشپړې شوې نهدي.
د پاکستان څخه کندهار ته د افغان کډوالو د راستنېدو لړۍ لاهم دوام لري چارواکي وايي چې په راتلونکو شپږو میاشتو کې به ۱۵۰۰ نورې کورنۍ هم دغه ولایت ته راشي.
راپور : محمد صادق رښتینی