په کندز کې چارواکي وايي چې د سره صلیب نړیوال سازمان د تښتول شوي کارکوونکي په لټه کې دي او ډېر ژر به ازاد شي.
د اسوشيټېډ پرېس خبري اژانس په حواله، د هسپانیې د بهرنیو چارو وزارت تائید کړې چې دا وګړی هسپانوی دی.
ناڅرګندو کسانو د دوشنبې په ورځ افغانستان کې د سره صلیب نړیوالې کمېټې دا کارکوونکی د کندز-مزار شریف پر لاره له موټره ښکته کړی او ناڅرګند ځای تهیې بیولی دی.
د کندز د والي ویاند سید محمود دانش پرون سې شنبه ازادي راډیو ته وویل چې د سره صلیب تښتول شوی مأمور د دې ولایت خان اباد ولسوالۍ پر لور بيول شوی خو د هغه ځای د موندلو لپاره د دوی هڅې جاري دي.
سید محمود دانش وايي، د سره صلیب نړیوالې ټولنې د هسپانوي کارکوونکي تښتوونکي لا نهدي پېژندل شوي خو ډاډ یې څرګند کړ چې امنیتي ادارې بهيې ډېر ژر ځای پیدا کړي.
سید محمود دانش زیاته کړه:
"د پېښې له لومړیو شېبو امنیتي ادارو په کار پيل وکړ. استخباراتي او معلوماتي ادارې خپل کار کوي او هڅه کېږي چې د دې وګړي ځای څرګند شي خو لا نهده څرګنده چې دا تښتوونکي په کومې ډلې پورې تړلي دي، هغوی غیر مسؤل وسلهوال کسان دي که وسلهوال طالبان دي؟ خو هغه معلومات چې تر اوسه موږ ته رارسېدلي، څرګندوي چې دا سړی د کندز د خان اباد ولسوالۍ په لور بیول شوی دی."
سید محمود دانش ډاډ څرګند کړ چې د سره صلیب نړیوالې ادارې دا مأمور ژوندی دی او په لنډ وخت کې به وموندل شي.
د پېښې د حساسیت له امله د مسئلې ډېر جزئیات نهدي څرګند شوي.
د کندز د والي ویاند سید محمو دانش وویل چې دا سړی یې د کندز علياباد ولسوالۍ ته نېږدې، د حاجي حسین په سیمه کې نیولی دی.
د سره صلیب نړیوالې کمېټې ویلي چې هېڅ وسلهوالې ډلې تر اوسه د دوی د کار کوونکي د تښتولو مسؤلیت نهدی اخیستی.
په مادرید کې ډیپلوماتیکو سرچینو تائید کړې چې یو هسپانوی وګړی چې په افغانستان کې یې د سره صلیب له نړیوالې ټولنې سره کار کاوه، ناڅرګندو کسانو تښتولی دی.
په افغانستان کې د دې سازمان ویاند احمد رامین ایاز له دې امله شدیده اندېښنه څرګنده کړه خو ویېویل چې داسې پېښې په افغانستان کې د دوی فعالیت ته خنډ نهشي پېښولای.
ښاغلي ایاز له ازادي راډیو سره په مرکه کې وویل چې د پېښې علت لا نهدی څرګند شوی.
د ایاز په وینا د سره صلیب نړیوالې ټولنې یو شمېر کارکوونکي له کندز ښاره د کار لپاره مزارشریف ته روان وو خو وسلهوالو کسانو یې د علياباد ولسوالۍ ته نېږدې موټر درولی او یو کارکوونکی یې ناڅرګند ځای ته ورسره بيولی دی.
احمد رامین ایاز زیاته کړه:
"د سره صلیب نړیوالې کمېټې دا کارکوونکی له خپلو یو شمېر همکارانو سره په دوو موټرو کې مرازشریف ته روان و. وسلهوالو کسانو یې موټر درولی، هغوی يې ښکته کړي او یو تنیې ورڅخه بیولی نور یې خوشې کړي دي. موږ څېړنې کوو چې دا پېښه څرنګه شوې او د خپل همکار د سلامتي او ازادي هڅې کوو."
د احمد رامین ایاز په وینا، تر دې مخکې هم د دوی همکاران تښتول شوي دي.
هغه څرګنده کړه چې د پېښې مسؤلیت چا نهدی اخیستی او د نورو جزئیاتو له ورکولو یې ډډه وکړه.
د رپوټونو په حواله، د روان کال له پیل راهیسې لږ تر لږه درې تنه بهرنیان یوازې په کابل کې تښتول شوي دي.
په اګسټ کې یو شمېر وسلهوالو کسانو چې پوځي جامې یې اغوستې وې، په کابل کې د امریکايي پوهنتون دوه ښوونکي وتښتول.
تر دې پېښې تقریباً دوه میاشتې وروسته یو اسټرالیايي وګړی د ښار له زړه وتښتول شو.
