د هند د ترورېزم ضد عالي ادارې په پاکستان کې دېره د یوې سخت دریځې ډلې مشر او درې نور سخت دریځي تورن کړل چې د هند پر یوې هوايي اډې یې په جنوري کې حمله ترسره کړې وه.
د هند په شمال کې پر دغې اډې په وسلهوال برید کې اووه هندي سرتېري وژل شوي وو.
د هند د تحقیقاتو ملي ادارې «NIA» د دوشنبې په ورځ د جېش محمد ډلې مشر مولانا مسعود اظهر، د هغه ورور مفتي عبدالرؤف اصغر او د دې ډلې دوه نور غړي په رسمي توګه تورن کړل او دوسیهیې محکمې ته وړاندې کړه.
د اسوشیټېډ پرېس خبري آژانس د راپور له مخې ټول تورن کسان په پاکستان کې اوسي.
دغې ادارې وویل، د هغو څلورو وسلهوالو چې له پاکستانه راغلي و او هندو ځواکونو ووژل، له ټیلیفوني مکالمو او د خوراکي موادو د خالي کڅوړو چې په پاکستان کې تولید شوي او د خوراکي نورو موادو د پاتې شونو څخه چې په یوه ځنګله کې موندل شوي، معلومه شوه چې حمله کوونکي له پاکستانه راغلي و.
پاکستان تر اوسه د دغو تورونو په اړه څه نهدي ویلي او داسې نهبرېښي چې دا هېواد به د جېش محمد د ډلې مشر مولانا مسعود اظهر او نور تورن هند ته په لاس ورکړي چې هلتهیې محاکمه کړي.
د هند د تحقیقاتو ملي ادارې دغهراز وویل چې د څېړنو په نتیجه کې معلومه شوه چې حمله کوونکي په پاکستان کې د اظهر او د هغه ورور مفتي عبدالرؤف لهخوا روزل شوي، تشویق او افراطيت ته هڅول شوي دي.
پاکستان له دې مخکې هم سخت دریځو ته د ځای او روزنې په ورکولو تورن شوی خو اسلاماباد دغه تورونه تل رد کړي دي.
هند دغهراز د ملګرو ملتونو د امنیت شورا د بندیزونو له کمېټې غوښتي چې اظهر ترورېست ونوموي خو د اسوشیټېډ پرېس په وینا چین چې له پاکستان سره له اوږدې مودې راهیسې نېږدې اړیکې لري ښایي د هند د دې هڅې مخه ونیسي.
دغه ډله پخوا په هند کې په تور لېست کې شامله شوې ده.
هند د تېرې جنوري میاشتې له حملې وروسته له پاکستان سره د کشمیر د لانجې او نورو ستونزو پر سر رسمي خبرې ودرولې.
اظهر مخکې هم د هند تر کنټرول لاندې کشمیر کې د ترسره شویو حملو په خاطر مجرم پېژندل شوی و او څو کالهیې د هند په زندان کې تېر کړي و.
نوموړی په ۱۹۹۹ کال د یوې هندي تښتول شوې الوتکې د برمته سپرلیو د خوشې کېدو بدل کې له زندانه خوشې شوی و.