د بلخ ولایت ژورنالېستانو او د خبریالانو له حقونو څخه مدافع بنسټونو د خبریالانو مصونیت او امنیت ساتنې کمېټې پر فعالیت بندیز ولګاوه.
د بلخ ولایت خبریالان شکایت کوي چې دوی یادې کمېټې ته درې تنه د بلخ د خبریالانو په استازیتوب ورمعرفي کړي و چې دا کسان د ازادو انتخاباتو پر بنسټ غوره شوي وو.
د بلخ ژورنالېستان ادعا کوي چې اوسمهال په کابل کې د رسنیو فدراسیون چې بلخ ولایت کې نمایندهګي هم نهلري، له دوی سره له مشورې پرته د بلخ د خبریالانو د استازو پر ځای په تحمیلي توګه درې، نوي کسان یادې کمېټې ته ورپېژندلي دي.
په بلخ کې د ارزو ټلوېزیون مشر نوراغا شریفي وايي:
"کومه تګلاره چې دوی غوره کړې ورسره ستونزه لرو. هغه تګلاره چې د بلخ هېڅ خبريال او د رسنۍ مسؤل ترې خبر نهلري، د يو داسې کمېسیون لهخوا چې بلخ ولايت کې نمايندګي نهلري، د دغه ولايت ټول خبريالانيې له نوم سره اشنا هم نهدي، راځي په تحميلي توګه درې کسان معرفي کوي، نو دغه لاره چې دوی غوره کړې، دا قانوني نهده."
د بلخ خبریالان وايي چې دا کسان په هېڅ ډول د دوی استازیتوب نهکوي او په همدې علت د یادې کمېټې فعالیت چې په اصل کې د یوه دولتي بنسټ په توګه د خبریالانو د ستونزو برخه کې کار کوي، تحریموي.
بلخ کې د خبریالانو د ټولنیز بنسټ مرستیال او د پژواک خبري اژانس ژورنالېست ذبیحالله احساس وايي، ستونزه دا ده چې د خبریالانو له نامه څخه په استفادې مرکز کابل کې ځینې پروژوي بنسټونه جوړ شوي او د خپلو ګټو د تأمینولو په خاطر د ولایتي خبریالانو له نامه او حق څخه استفاده کوي.
ښاغلي احساس زیاته کړه:
"فدارسیونونه، ځینې کمېټې او کمېسیونونه د خبریالانو په نامه کابل کې جوړېږي، هغوی په کلونو کلونو ولایتونو ته سفر هم نهکوي، نو زه نهپوهېږم چې دوی څنګه ځان ته حق ورکوي چې زموږ په استازیتوب یادې کمېټې ته کسان معرفي کړي. دا څنګه قانون دی؟ چې د یوه ولایت خبریالانو لپاره د دوی د ستونزو د حل لپاره نمایندهګان ټاکل کېږي او هماغه ولایت له خبریالانو پوښتنه نهکېږي."
د بلخ د خبریالانو لهخوا یادې کمېټې لپاره له درېیو ټاکل شویو خبریالانو یو ذبیحالله عسکرزاده دی.
دی وايي چې بلخ مېشتي خبریالان به د یادې مسئلې په وړاندې چوپه خوله پاتې نهشي او خپل غږ به ان د ملګرو ملتونو تر سیاسي دفتر هم ورسوي.
عسکرزاده وویل:
"اعتراض کوونکي د بلخ له اطلاعات او فرهنګ رياست، د مطبوعاتو امريت، همداراز له ملي او نړيوالو ټولنو لکه، بلخ کې د ملګرو ملتونو سياسي نمايندګي-يوناما او د بشر حقونو رياست څخه غواړي چې دا موضوع په پرېکنده توګه په ناپېيلي ډول وڅېړي او د ډموکراسي د پلي کېدو لپاره ګام پورته کړي."
دا په داسې حال کې ده چې د بلخ اطلاعاتو او کلتور ریاست مشر صالح محمد خلیق هم په کابل کې د خبریالانو د فدراسیون دا عمل د رسنیزو قوانینو او اخلاقو خلاف بولي.
خلیق وايي چې یادې کمېټې ته باید د بلخ د خبریالانو په استازیتوب کسان د ازادو انتخاباتو له لارې وټاکل شي.
تر دې دمه یادې کمېټې ته له کابله د رسنیو د فدراسیون ورپېژندل شویو استازو، په دې اړه څرګندونې نهدي کړي.
کزارش: مجیبالرحمن حبیبزی