د اسیا د زړه شپږم کنفرانس چې مهمې موضوعګانې یې له ترورېزم سره مبارزه، سوداګري، زیربنا او سیمه ییزه همکاري ده، د یکشنبې په ورځ د هندوستان په امرتسر کې جوړېږي.
د جمهوري ریاست اعلامېې له مخې جمهور رئیس اشرف غني د عربي اماراتو له سفر وروسته د امرتسر کنفرانس کې ګډون کوي.
د دې اعلامېې له مخې جمهور رئیس غني به په دغه کنفرانس کې د سولې په ټینګښت او د افغانستان په لاسته راوړنو خبرې وکړي.
په ورته وخت کې په هندوستان کې د افغانستان سفیر شیدا محمد ابدالي وايي، ګډون کوونکو هېوادونو، د ترورېزم پر وړاندې د ګډې مبارزه په مقصد، د افغان حکومت لهخوا چمتو شوې اعلامیه لاسلیک کړه.
ښاغلی ابدالي وايي:
"پر دوو لویو موضعګانو، له ترورېزم سره په مبارزې او په سیمه کې په اقتصادي پرمختګ او پراختیا خبرې کېږي، له نیکهمرغه نن چې کومه اعلامیه خپره شوه، ټولو هېوادونو يې ملاتړ وکړ او د خبرو فضا دوستانه وه."
هندوستان کې د افغانستان سفیر اوسنیو سیمه ییزو ستونزو ته اشاره وکړه او د یادو ستونزو اورولو ته یې دغه ډول ناستې مهمې وبللې.
افغان چارواکي وايي، د اسیا زړه تېرو پنځو ناستو، ښې نتیجې نه لرلې خو هیله ده چې دغه ناسته لاسته راوړنې ولري.
باور جوړونه، له ترورېزم سره مبارزه، سوداګري، زیربنا، د روزنې او تحصیلاتو اړوند سیمه ییزه اقتصادي همکاري، د اسیا د زړه د کنفرانس شپږګوني تدابیر په ګوته کېږي.
راپور: خان محمد سیند