ډېرو بهرنیو مطبوعاتو ته د افغانستان او ترکمنستان ترمنځ د اورګاډي د پټلۍ افتتاح مهمه ښکاره شوې او لیکنې یې پرې خپرې کړي دي.
باسټن ګلوب:
باسټن ګلوب ورځپاڼې د افغانستان او ترکمنستان د ولسمشرانو له لوري د دوو هېوادونو ترمنځ د رېلګاډي د پټلۍ د پرانېستل کېدو په لیکنه کې لولو: په دې لاره به د لومړي ځل لپاره له ترکمنستانه په رېلګاډي کې افغانستان ته اوړه، غنم، کیمیايي سره او یوه اندازه تعمیراتي مواد یووړل شي.
د باسټن ګلوب په باور د اورګاډي په پټلۍ د افغانستان او ترکمنستان وصل کېدل د دغو دوو هېوادونو او همدا راز د تاجکستان، چین، هند او پاکستان ترمنځ د تجارتي او اقتصادي همکاریو د پراختیا لاره هواروي.
رېلوې ګزټ:
د بریتانیا (رېلوې ګزټ) خپرونې هم په همدې موضوع لیکنه خپره کړې ده.
دې خپرونې لیکلي چې دا رېللار د بشپړېدو په صورت کې نه یوازې د سیمې د هېوادونو ترمنځ د سوداګري اړیکو له ډېرېدو سره مرسته کوي بلکې افغانستان او د سیمې نور هېوادونه د کسپین سمندرګي له لارې د قفقاز او اروپا له هېوادونو سره نښلوي.
له دې پروژې جلا ترکمنستان د افغانستان پولي ته نېږدې د امام نظر په ګمرک کې د تېلو یوه لویه زېرمه یا ترمینل جوړ کړی څو افغانستان ته په اسانه تېل صادر کړي.
په دې ترمینل کې د کال ۵ لکه ۴۰ زره ټڼه تېل زېرمه کېدای شي.
د ترکمنستان او د افغانستان د اقینې ترمنځ د اورګاډي پټلۍ له ګاونډیو هېوادونو څخه افغانستان ته دوهمه رېللار ده.
تر دې وړاندې له ازبکستانه تر مزاشریف ښاره رېللار جوړه شوې او همدا راز له ایرانه د هرات تر هوايي ډګره پورې پر بلې رېللارې کار روان دی.
پاکستان هم ډېر کلونه پخوا ویلي و چې له چمنه سپینبولدک او له تورخمه تر جلالاباد ښاره د اورګاډي پټلۍ جوړوي.
صوفیه ګلوب:
د بلغاریا چاپ صوفیه ګلوب ورځپاڼې له دغه اروپايي هېواده په خپله خوښه د ۵۰ تنو افغان پناه غوښتونکو د بېرته ستنېدو خبر خپور کړی دی.
خو ورځپاڼې دا کسان نه پناه غوښتونکي او نه مهاجر بللې بلکې هغوی یې د افغانستان ۵۰ غیر قانوني اتباع بللي او لیکلي یې دي چې د ۲۰۰ نورو افغانانو د اسنادو د څېړلو بهیر هم روان دی.