په ولسي جرګه کې د نورستان خلکو استازي وايي چې له تېرې یوې اوونۍ راهیسې د نورستان دواب او منډول ولسوالۍ د وسلهوالو مخالفینو په محاصره کې او له جدي ګواښ سره مخ دي خو مرکزي حکومت دغې مسئلې ته پام نهکوي.
دوی د دوشنبې په ورځ ازادي راډیو ته وویل، که امنیتي ارګانونه ژر دغې مسئلې ته پام ونهکړي دغه ولسوالۍ به سقوط وکړي او خلک بهیې له جدي ستونزو سره مخامخ شي.
په ولسي جرګه کې د نورستان خلکو استازي احمدالله مؤحد په دې اړه وویل:
"د نورستان دواب او منډول ولسوالۍ له یوې اوونۍ راهیسې د وسلهوالو په محاصره کې دي او دولت تر اوسه په دې برخه هېڅ پرېکړه نهده کړې، څو-څو ځلي دغو ولسوالیو سقوط وکړ او په لسګونه افغان پولیسو ته پهکې مرګ ژوبله واوښته په دغې سیمه کې د کانونو او کورونه ویجاړ شول که د دغه وضعیت څخه مخینوي ونهشي نو په دواب ولسوالۍ کې به له دې هم خطرناک وضعیت راشي."
دغه څرګندونې په داسې حال کې مطرح کېږي چې د نورستان ولایت سرپرست حافظ عبدالقیوم نن سهار ازادي راډیو وویل، وسلهوالو طالبانو له تېرې شپې راهیسې د دواب ولسوالۍ پر مرکز ډلهییزې حملې کړي او د افغان ځواکونو او وسلهوالو تر منځ اوس هم په شدت سره جګړه روانه ده.
نورستان د افغانستان په شمال ختیځ کې له ستراتیژیکو او کلیدي ولایتونو څخه دی چې تل د شدیدو ناامنیو شاهد وي.
په ولسي جرګه کې د نورستان خلکو یوې بلې استازې پروین نورستانۍ هم ازادي راډیو ته وویل، که د دغه ولایت امنیت ته پاملرنه ونهشي د افغانستان شمال او ختیځ به هم د وسلهوالو مخالفنیو له جدي ګواښونو سره مخ شي.
بلخوا د دفاع وزارت مرستیال ویاند محمد رادمنش ازادي راډیو ته وویل چې د نورستان دواب ولسوالۍ اوسمهال له ګواښونو تصفیه شوې او افغان امنیتي ځواکونه توانېدلي چې له دغې ولسوالۍ نه وسلهوال په شا وتمبوي.
ښاغلی رادمنش زیاتوي:
"دواب ولسوالۍ چې نورستان ولایت پورې مربوط ده په تېرو ۲۴ ساعتونو کې وسلهوالو مخالفینو هلته ځیني تحرکات درلودل، د ملي اردو ځواکونه هلته دي او وسلهوالو مخالفینو تهیې غاښ ماتونکی ځواب ورکړ چې په نتیجه کې ځیني وسلهوال ووژل شوو او ځیني هم ټپیان شول چې اوسمهال د دواب ولسوالۍ د مخالفینو له ګواښ څخه تصفیه شوه."
په ورته وخت کې پوځي کارپوه حیګل سلیمانخېل ازادي راډیو سره په خبرو کې نورستان د افغان حکومت لپاره یوه ستراتيژیکه سیمه یاده کړه او ویېویل، اړتیا ده چې د دغه ولایت امنیت خوندي وي او په یاد ولایت کې افغان امنیتي ځواکونو ته د هوا له لارې اکمالات ورسول شي.
راپور: مرضیه احمدزۍ
