د افغان ځوانانو د مدني ټولنې انجمن د ملي وحدت حکومت له مشرانو غواړي چې قومي اختلافات یو خواته کړي او خلکو ته بنسټیز کارونه وکړي.
وروسته له هغې چې د ملي وحدت حکومت د مشرانو ترمنځ اختلافات رسنیز شول د افغان ځوانانو د مدني ټولنې انجمن وايي، روان وضعیت د ملت په خیر نه دی او خلک یې په غُصه کړي دي.
د دغه انجمن رئیس فردین فدايي، د جمعې په ورځ کابل کې خبریالانو ته وویل، د رهبرانو لهخوا قومي تعصباتو ته لمن وهل او د ځینو چارواکو لهخوا له قانونه سرغړونه د حکومت او خلکو ترمنځ واټن رامنځته کړی.
ښاغلی فدايي وايي:
"د افغانستان په کچه له قانونه سر غړونه روانه ده، د ملي وحدت حکومت د مشرانو له ادرسه قومي او مذهبي تعصباتو ته لمن وهل کېږي،دا موضوعات موږ کړوي، له ملي وحدت حکومته د انجمن غوښتنې دادي څومره چې ژر کېږي حکومتي مشران دې په هره برخه کې چې وي د افغانانو ته بنسټیز کارونه وکړي."
ښاغلي فدايي وايي، د افغان امنیتي ځواکونو ترمنځ نه همغږي، د ځوانانو ورځ تر بلې زیاتېدونکې ستونزې، د ښځو پر وړاندې تاوتریخوالي او د ملکي کسانو وژل کېدل هغه څه دي چې د حکومت مشرانو باید ورته پام وکړي.
دغه انجمن د یوه پریکړهلیک په صادرولو سره د افغان حکومت له عدليي او قضايي بنسټونو یو شمېر غوښتنې هم مطرح کړې.
د قانون پلي کول او له سر غړونکو سره یې جدي چلند، د عدلي او قضايي بنسټونو له لوري د هغو کسانو مجازات چې ملي وحدت ته زیان رسوي او ښې حکومت لپاره هڅه هغه غوښتنې دي چې د انجمن لهخوا په پریکړهلیک کې ذکر شوی وې.
دا په داسې حال کې ده چې په دې وروستیو کې په ښې حکومتوالۍ کې د ولسمشر ځانګړي استازي احمد ضیا مسعود په ولسمشر او اجرائیه رئیس باندې نیوکې کړې دي.
په ورته وخت کې د ولسمشر لومړي مرستیال عبدالرشید دوستم ولسمشر او اجرائیه رئیس په قوم پالنې تورن کړی، جمهوري ریاست د یوې اعلامیې په خپرولو سره ویلي چې دا ډول تورونه عدليي او قضايي پلټنو ته اړتیا لري.
د حکومت اجرائیه رئیس عبدالله عبدالله د یکشنبې په ورځ ویلي و چې داسې مسائل شته چې په اړه یې له ولسمشر سره خبرې روانې دي.
د اجرائیه ریاست مرستیال ویاند سید امید میثم ازادي راډیو ته وویل چې د نظرونو توپير به د حکومت په لویو کارونو تأثیر ونهکړي.
میثم وايي:
"د نظرونو توپير په دې معنی نه دی چې د حکومت په کارونو او حکومتوالي کې دې سستوالي رامنځ ته شي، د حکومت په کچه کارونه په نارمل ډول مخ ته ځي، دغه بحثونه چې د حکومت د رهبرانو ترمنځ روان دي د هېواد په لویو کارونو منفي تأثیر نه پرې باسي."
ښاغلي میثم همدارنګه ټینګار کوي، د ملي وحدت حکومت مشران هغو وعدو ته ژمن دي چې له خلکو سره یې کړي او هڅه کوي چې د خلکو قانوني غوښتنې پرځای شي.
بلخوا د افغان ځوانانو د مدني ټولنې انجمن وايي، په ډېری برخو کې د قانون مواد د کاغذ پر مخ پاتې کېږي، که ورته پام ونه شي، نو ستونزې به له دې هم ډېرې شي.
رحمت الله افغان