د افغانستان ملي دفاع وزارت وايي، د وسلهوالو او ترورېستي ډلو د یوځای کېدو له امکانه ځانګړې اندېښنه نهلري او دا به د دوی پر دریځ یا پوځي عملیاتو اغېز ونهکړي.
د ملي دفاع وزارت مرستیال ویاند محمد رادمنش پرون دوشنبه ازادي راډیو ته وویل، د دې ډلو یوځای کېدل به امنیتي ستونزې زیاتې کړي خو د دوی پر دریځ اغیز نهشي کولای.
محمد رادمنش زیاته کړه:
"هغه فورمول چې دا ډلې ښايي یوځای شي، تهدیدونه زیاتولای شي خو که وکتل شي، دې ډلو مخکې هم هڅه کړې چې په ګډه د دولت لپاره ستونزې جوړې کړي. په هر حال کې موږ به که دا ډلې یوځای وي یا متفرقې، زموږ اقدامات به هماغسي وي. زموږ په باور دا ډلې د خپلو ګټو پر اساس، که سره یوځای هم شي د لنډې مودې خبره به وي او بېرته به متفرقې شي."
افغانستان کې د امریکايي ځواکونو عمومي قوماندان جنرال نېکلسن د یکشنبې په ورځ امریکايي ټلوېزیون «اېن، بي، سي» او انډين اېکسپرېس خپرونې ته په جلا-جلا مرکو کې وویل چې وسلهوال طالبان، د حقاني شبکه، لشکرطیبه او د القاعدې غړي سره مدغم کېدونکي دي.
دې لوړ رتبه امریکايي جنرال ویلي چې طالبان او د حقاني شبکه لاهم په پاکستان کې خوندي ځایونه لري او هغوی ته اجازه ورکول کېږي چې په افغانستان کې حملې وکړي.
افغانستان کې د ناټو او امریکايي ځواکونو دې قوماندان په وینا د حقاني شبکې، وسلهوالو طالبانو، لشکرطیبه او د القاعدې غړو مدغم کېدل دا معنی لري چې ترورېستان به د هندیانو او امریکایانو د ګټو پر ضد د حملو لپاره د افغانستان له خاورې د اډې په ډول کار اخلي.
جنرال نېکلسن ویلي چې د امریکا دفاع وزارت تهیې خپله اندېښنه وړاندې کړې او د دفاع وزیر اشټون کارټر تهیې ویلي چې په پاکستان کې د حقاني پر شبکې کافي فشار نهدی راوستل شوی.
د پاکستان حکومت ملکي یا پوځي چارواکو د جنرال جان نېکلسن د وروستیو څرګندونو په اړه غبرګون نهدی ښودلی خو د افغانستان دفاع وزارت وايي چې د ترورېزم پر ضد مبارزه بهیې جاري وي او وسلهوالو ډلو ته به اجازه نهورکوي چې د افغانستان له خاورې د هېڅ بل هېواد د ګټو پر ضد کار واخلي.
د افغانستان حکومت ټینګار کوي چې د هغو وسلهوالو لپاره د مذاکرو او سولې دروازه پرانیستې ده چې له وسلهوالو فعالیتونو لاس اخلي او د دې هېواد د اساسي قانون په چوکاټ کې فعالیت ته تیاری څرګندوي.
په افغانستان کې د ناټو او امریکايي ځواکونو قوماندان انډین اېکسپرېس او «اېن، بي، سي» ټلوېزیون ته ویلي چې پاکستان له یوې خوا وسلهوال طالبان د سولې خبرو ته هڅوي او له بل لوري حقاني شبکه هلته پناهځایونه لري او په افغانستان کې حملې کوي.