د افغانستان د عدليې وزارت او د بشري حقونو څخه د ملاتړ اداره وايي چې تر اوسه د بشري حقونو د خوندیتوب په برخه کې د نړیوال سازمان لهخوا له ترلاسه شویو ۴۰۱ سپارښتنو څخه يوازې ۲۱ سلنهیې په افغانستان کې پلي شوي.
د يادو ادارو د مسؤلینو په وینا له دغو سپارښتنو څخه ۵۰ سلنهیې د پلي کېدو په حال کې دي او ۲۹ سلنه نورې یې نهدي پلي شوي.
د افغانستان د عدليې وزارت مرستیال ذبیحالله هاشمي د یکشنبې په ورځ په کابل کې د يوه خبري کنفرانس پر مهال وویل، افغانستان کې د بشري حقونو سپارښتنو د پلي کېدو کچه ډېره ټيټه ده او که دغه سپارښتنې په سمه توګه پلي نهشي نو د نړېوالې ټولنې په وړاندې به د افغانستان حیثیت تر پوښتنې لاندې راشي.
ښاغلي هاشمي زیاته کړه:
"په ټوله کې ۴۰۱ سپارښتنې دي چې له بدهمرغه د سپارښتونو د پلي کېدو سطحه ډېره ټيټه ده چې دا د افغانستان لپاره د خطر زنګ دی، مختلفې دولتي او نورې ادارې باید دغه سپارښتنې پلي کړي او که په پلي کولو کې يې موږ پاتې راشو نو دا د افغانستان د حیثیت لپاره ډېره بده ده."
د افغانستان عدليې وزارت او له بشري حقونو څخه د ملاتړ ادارې د راپور له مخې دغه سپارښتنې، د قوانینو اصلاح، د اداري فساد، د کار حق او د مېرمنو په وړاندې د تاوتریخوالي، د ماشومانو د ناوړه وضعیت، د نشهيي توکو، ځورونې او د ملکیانو د مرګ ژوبلې په وړاندې د مبارزې په برخو کې دي.
د افغانستان د عدلیې وزارت چارواکي وايي، دوی دغه سپارښتنې له ټولو ادارو سره شریکې کړي او د پلي کېدو غوښتنهیې کړې ده.
په ورته وخت کې د افغانستان د بشري حقونو خپلواک کمېسیون ویاند رفیعالله بېدار ازادي راډيو سره په خبرو کې د دغو سپارښتنو په پلي کېدو ټینګار وکړ او ویېویل چې دغه سپارښتنې باید په وخت سره پلي شي او راپور يې هم اړوندو ادارو ته واستول شي.
ښاغلي بېدار زیاته کړه:
"د دغو سپارښتونو په برخه کې باید نور کار هم وشي او جدي ونیول شي او دغه سپارښتنې باید په وخت او موقع سره باید پلي شي او د اجرأتو په برخه کې مربوطه کمېټو ته معلومات وړاندې کړي."
دا څرګندونې په داسې حال کې کېږي چې افغانستان د بشري حقونو د خوندیتوب په برخه کې په ملي او نړیواله کچه له کلک انتقاد سره مخ دی.
افغانستان تر اوسه د بشري حقونو په برخه کې د اوو نړیوالو کنوانسینونو غړیتوب لري او اړ دی چې په هېواد کې د بشري حقونو د پلي کېدو او وضعیت په اړه د بشري حقونو څارونکو بنسټونو ته راپور ورکړي.
راپور: محمد واصل وصال
