د ازبکستان حکومت د ولسمشر اسلام کریموف د مړینې خبر تردې دمه نه دی تائید کړی خو کابینې نن اعلان وکړ چې نوموړی په روغتون کې په نازک حالت کې دی.
دا اعلان نن سهار د خلق سوزي Halq Sozi دولتي ورځپاڼې او د کابینې رسمي ویبپاڼې خپور کړ.
په بیان کې راغلي چې کریموف د اګسټ په ۲۴ مه روغتون ته انتقال شو، په تېرو ۲۴ ساعتونو کې یې وضعیت خراب و او اوس یې ډاکټران وضعیت نازک ګڼي.
خو رویټرز خبري آژانس د ډیپلوماټیکو سرچینو په حواله لیکلي چې کریموف مړ شوی دی.
درېیو ډيپلوماټیکو سرچینو چې رویټرز یې هویت نهدی ښودلی تائید کړې ده چې اته اویا کلن کریموف د ورپېښې ناروغۍ له کبله مړ شوی دی.
تر اوسه روښانه نه ده چې د کریموف پرځای به څوک د ازبکستان راتلونکی ولسمشر وي.
ازبکستان د منځنۍ آسیا هغه هېواد دی چې تر ټولو زیات نفوس لري.
کریموف خپل ځای ناستی نه دی غوره کړی خو څارونکي وايي چې ښايي د قدرت انتقال په اړه پریکړه د جګپوړو چارواکو او د کریموف د کورنۍ د غړو په ګډون د بندو دروازو شاته وشي.
د څارونکو په باور که دا غونډه د کریموف د ځای ناستي په ټاکلو بریالۍ نهشي نو ښايي ازبکستان چې ۳۲ میلیونه وګړي لري بې ثباته شي او د اسلامي دولت ډلې، په څېر د تروریستي ډلو هدف وګرځي.
چارواکو او د کریموف کورنۍ دا خبر له تېرو څو ورځو راهیسې پټ ساتلی و خو د لومړي ځل لپاره د یکشنبې په ورځ کابینې خبر ورکړ چې کریموف په روغتون کې بستر شوی مګر د هغه د نازک حالت په اړه یې هیڅ نه و، ویلي.
د هغې ورځې په سبا د کریموف لور لاله کریمووا پر خپله انسټاګرام پاڼه په یوه بیان کې وویل چې پلار یې مغزي سکته کړې ده.
په ځینو ناتایید شوي راپورونو کې راغلي چې کریموف د اګسټ په ۲۹ مه مړ شوی.
د کریموف د مړینې په اړه شکونه هغه مهال زیات شول چې پرون په پلازمینه تاشکند او نورو لویو ښارونو کې له پخواني شوروي اتحاد څخه د ازبکستان د خپلواکۍ کلیزه د اسلام کریموف په غیاب کې ولمانځل شوه او د هغه د پلرني ټاټوبي سمرقند ښار په بېلابېلو سیمو کې پرون لارې، کوڅې د پاکولو په پلمه بندې شوې او خلکو ته د تګ راتګ اجازه نه ورکول کېده.
ویل کیږي چې د ازبکستان صدراعظم شوکت میرزایوف سمرقند ته رسېدلی او رویټرز خبري اژانس راپور ورکړی چې د قزاقستان ولسمشر نورسلطان نظربایف هم چین ته خپل سفر لنډ کړی او په پام کې لري چې سبا ازبکستان ته ولاړ شي.