ایشین ریویو:
ایشین ریویو خپرونه د افغانستان په اړه په یوه مطلب لیکي، داسې ښکاري چې د اسلامي دولت ډله په افغانستان کې تر فشارلاندې ده.
خپرونه د کارپوهانو په وینا لیکي:
هغو د پام وړ زیانونو چې داعش ته په وروستیو کې رسېدلې، دغه ډله یې اړ کړې چې خپل تکتیکونه بدل کړي او ځان وژونکو حملو ته مخه کړي.
په کابل کې د جولای د میاشتې په برید کې چې داعش یې مسؤلیت په غاړه اخېستی، ۸۰ تنه ووژل شول او له ۲۰۰ زیات نور ټپیان شول.
ایشین ریویو خپرونه لیکي:
څه باندې یو کال مخکې په افغانستان کې د داعش د حضور څرګندیدو افغان ولسمشر اشرف غني اړ کړ چې د امریکا د کانګرس غړیو ته د هغه ستر ګواښ خبرداری ورکړي چې داعش افغانستان او د هغه ګاونډیانو د مرکزي آسیا هېوادونو ته متوجه کړې دی.
خپرونې وړاندې په دې اړه چې ولې داعش ډله په افغانستان کې کمزورې شوې، د افغانستان د تحلیلګرانو د شبکې چې په افغانستان کې سیاسي پېښې له نېږدې څاري، نظر اخېستي چې ویلي یې دي، له نېږدې دوو کلونو راهیسې چې دغې ډلې په منځني ختیځ کې د داعش مشر ابوبکر البغدادي ته بیعت اعلان کړی، د ځان لپاره یې ډېر دښمنان پیدا کړي دي.
د دغې شبکې په وینا د داعش نفوذ ډېر کمزوری شوی او وسلهوال یې دې ته اړ شوي چې د افغانستان په ختیځ ننګرهار کې چې یو وخت یې هڅه کوله په دې ولایت کې د ځان لپاره اډه جوړه کړي، یوازې خپل فعالیت په څو کمو ولسوالیو پورې محدود کړي.
ایشین ریویو د سیمه ییزو امنیتي کارپوهانو په حواله لیکي:
د داعش راتلونکې په تېره سیمه کې د خپل نفوذ د پراخوالي لپاره د ناکامو هڅو وروسته په افغانستان کې تیاره ښکاري.
دغو کارپوهانو ویلي چې داعش به د خپلې بقا لپاره خپل فعالیت د یوې انزوایي ډلې په توګه په محلي کچه مخ ته یوسي، یا به هم پټې څانګې جوړي کړي.
ټایم مجله:
ټایم مجلې د افغانستان په اړه په یوه لیکنه کې په هلمند کې د بې پولې ډاکټرانو روغتون ته پام اړولی دی.
مجلې د فوټو ژورنالېست کادیروان لوهویزن چې په وروستیو کې یې له افغانستانه لیدنه کړې، څرګندونې را اخېستي چې ویلي یې دي، موږ تل دا خبره کړې چې هېڅ خبر د ښه خبر په معنی دی خو کله چې پېښو ته د ټلویزیوني کمرو پام کمیږي، دا ښایي د حالاتو د لا خرابېدو په معني وي.
نوموړی وایي، دې مسئلي ته په پام سره یې د مسؤلیت احساس وکړ چې دغه واقعیت مستند کړي.
ټایم هلمند ته د دغه هالنډي خبریال د سفر او په دې ولایت کې د بې پولې ډاکټرانو له روغتونه د هغه د لیدنې په اړه لیکي:
دغه روغتون چې د ناروغانو لپاره درې سوه بستره لري او شاوخوا یو میلیون کسانو ته روغتیایي خدمات وړاندې کوي د افغانستان په جنوب کې تر ټولو لوی او په هلمند کې یوازینی روغتون دی.
په دغه روغتون کې شاوخوا اوه سوه افغان او پنځه ویشت بهرني کارکوونکي د ماشومانو له څانګې نیولې تر عاجلې، ارتوپیدي، د سوځیدنې، لومړنیو مرستو او جراحي په څانګو کې کار کوي.
ټایم لیکي:
دغه هالنډي خبریال په هلمند کې د ناامنیو یادونه کوي او ویلي يې دي چې د دې ولایت اکثره لېرې پرتې سیمې د طالبانو په لاس کې دي او هغه کسان چې په لښکرګاه کې دغه روغتون ته راځي، د جګړو له کرښو تېریږي او دې ځای ته رسیږي.
د ټایم په وینا کندز کې د تېر کال د بې پولې ډاکټرانو پر روغتون د بمبارۍ غمیزې، په پاکستان کې پر یوه روغتون ځانوژونکې حملې او په یمن کې د بې پولې ډاکټرانو پر یوه روغتون هوایي حملې ته په پام سره د هلمند د روغتون په څېر دا ډول روغتونونه نه یوازې دا چې تل له خلکو ډک وي بلکه جدي اهداف هم ګڼل کېږي.