د افغانستان سوداګرۍ او صنایعو وزارت وایي، ښایې نن چهارشنبه د ورځې په ترڅ کې د سپین بولدک او چمن تر منځ لاره بېرته پرانیستل شي.
دا وزارت وایي، له پاکستاني چارواکو سرهیې د سپین بولدک-چمن تر منځ لارې د پرانیستلو په خاطر په لوړه کچه تماسونه نیولي دي.
دغه لاره له نېږدې یوې اوونۍ راهیسې د مسافرو او سوداګرو پر مخ تړلې ده.
د دې وزارت ویاند مسافر قوقندي وایي چې ښایي دغه دروازه نن بېرته پرانیستل شي.
ښاغلي قوقندي زیاته کړه:
"د ډیپلوماټيکو مراجعو له لارې خبرې شوي او په لوړه کچه هڅې روانې دي. انشاالله په نېږدې راتلونکي کې یا نېږدې ساعتونو کې ښایي دا لاره پرانیستل شي."
د نوموړي په وینا د افغانستان او پاکستان تر منځ د سوداګرۍ او ټرانزیټ په برخه کې دا مهال کوم دوه اړخیز تړون نهشته خو دواړه هېوادونه د سوداګرۍ د نړیوال سازمان د قوانینو له مخې خپلو کې راکړه-ورکړه لري.
د ځایي چارواکو په وینا د سپین بولدک او چمن تر منځ لاره د اسد په ۲۸مه وروسته له هغې د پاکستاني سرحدي ځواکونو لهخوا وتړل شوه چې ځینو کسانو سپین بولدک کې د پاکستان بیرغ ته اور واچوه.
په همدې حال کې اسلاماباد کې د افغانستان سفیر حضرت عمر زاخېلوال په خپلې ټویټر پاڼه کې د پاکستان بیرغ ته اور اچول غندلي او ویلي یې دي چې د لارې د تړل کېدو له امله خلکو ته زیات زیان رسېدلی دی.
په جنوب کې د افغانستان او پاکستان تر منځ پر کرښې دا ستونزې په داسې حال کې رامنځته شوي چې په دې وروستیو کې کندهار کې د کلدارو پر کارولو بندیز ولګول شو.
د کندهار پولیسو همداراز په وروستیو کې لسګونه هغه پاکستاني کارکوونکي بېرته پاکستان ته واستول چې د اوسېدو قانوني اسناد یې نهدرلودل.
تر دې مخکې د روان کال په ترڅ کې د تورخم بندر هم څو ځله د مسافرو او سوداګرو پر وړاندې وتړل شو چې د سوداګرۍ او صنایعو خونو یې سوداګرو ته اوښتی زیان لسګونه میلیونه ډالر یاد کړ.
په ورته وخت کې د کندهار د سوداګرۍ او صنایعو خونو مرستیال انجینر عبدالباقي وایي، هره ورځ په تازه مېوو بار سلګونه موټرې له دې لارې پاکستان ته ځي او دغه هېواد په ځانګړي توګه د مېوو د محصولاتو په موسم کې په یوه او بله بهانه لاره تړي.
ښاغلي عبدالباقي زیاته کړه:
"موږ شاهد یو چې هر کال د محصولاتو په وخت کې یوه خاصه بهانه جوړه او موټرې راګرځول کېږي چې تاوانیې موږ ته رسېږي."
وموغوښتل د یادې ستونزې په اړه په کابل کې د پاکستان سفارت نظر واخلو خو بریالي نهشوو.
خو د ښاغلي باقي سپارښتنه دا ده چې حکومت باید داسې یو پروسیجر رامنځته کړي چې له مخې یې سوداګرو ته د ګاونډیو په ځانګړي ډول پاکستان لهخوا دا شان ستونزې جوړې نهشي.
خو د سوداګرۍ او صنایعو وزارت وایي، د دوی هڅې تل دا دي چې د سرحدي ستونزو د رامنځته کېدو په صورت کې د سوداګرو د زیات زیان مخه ونیسي.
راپور: محمد قسیم سولهمل
