د افغانستان دفاع وزارت وايي چې په لوګر کې یې د یوې پاکستانۍ هلیکوپټرۍ د بېړنۍ ناستې په اړه څېړنې پیل کړي دي.
د دغه وزارت د ویاند مرستیال محمد رادمنش وايي چې هلیکوپټرۍ د ازرۍ ولسوالۍ په لکۍ سیمه کې چې خورا صعب البوره ده اضطراري ناسته کړې ده.
ښاغلي رادمنش د جمعې په ورځ ازادي راډیو ته وویل چې پاکستان وړاندې د افغانستان له فضايي حریم څخه روسیې ته د ترمیم لپاره د مې ۱۷ ډوله هلیکوپټرې د تېرېدو اجازه اخېستې وه خو له څېړونو وروسته به دا روښانه شي چې هماغه هلیکوپټره ده او که نه.
ښاغلي رادمنش زیاته کړه:
"د پاکستان دولت د افغانستان له فضا څخه روسیې ته د ترمیم لپاره د یوې پاکستاني هلیکوپټرۍ د تېرېدو اجازه اخېستې وه په دې اړه څېړنې رواني دي چې ایا دا هماغه هلیکوپټره ده او که نه خو د څېړونو له پای ته رسېدو وروسته به موضوع روښانه شي."
یوه ورځ وړاندې په کابل کې د پاکستان سفارت اعلان وکړ چې یوه پاکستانۍ هلیکوپټرې د افغانستان په لوګر ولایت کې سقوط کړی.
دغه مې ۱۷ هلیکوپټره د پاکستان له پنجاب ایالت څخه له شپږو عملو سره چې یوه عمله یې روسی انجنیر و؛ د لوګر په ازره ولسوالۍ کې اضطراري ناسته وکړه.
د طالبانو ځینو سرچنیو له رسنیو سره په خبرو کې ویلي چې د دغه هلیکو پټرۍ ټوله عمله یې نامعلوم ځای ته انتقال کړې ده.
د پاکستان د پوځ ویاند عاصم باجوا په خپلې ټویټرپاڼه کې لیکلي چې پاکستانۍ هلیکوپټره د ازبکستان له لارې روسیې ته پر لاره وه چې د افغانستان د لوګر ولایت په ازرې ولسوالۍ کې یې سقوط وکړ.
له دې ټولو سره-سره یو شمېر سیاسي کارپوهان بیا د افغانستان په خاوره کې د دغه هلیکوپټرۍ اضطراري ناستې په افغانستان کې له تروریستانو د ملاتړ پیچلې ریښې روښانه کوي.
سیاسي کارپوه محمد بشیر هاتف وايي، په دې الوتکه کې د روسیې وګړي موجودیت د دې احتمال ډېروي چې روسیه له طالبانو څخه د ملاتړ په برخه کې له پاکستان سره همغږي شوي.
ښاغلي هاتف زیاته کړه:
"کله چې د پاکستان پوځي کارپوهان له روسیې اتباعو سره یوځای هلیکوپټره په هغه سیمه کې چې وسله وال مخالفین په کې فعاله حضور لري اضطراري ناسته کوي په دې معنا ده چې د طالبانو د پاکستان د پوځیانو او روسانو ترمنځ اړیکې شته."
له دې وړاندې په ولسي جرګه کې د ځینو ولایتونو له استازو داسې راپورونه ورکړل شوي و چې ګواګې پوځي هلیکوپټرۍ په ننګرهار، لوګر، بغلان او کندز د حکومت وسله وال مخالفین اکمالوي او نقاب پوشه خلک دغو سیمو ته انتقالوي خو افغان حکومت هیڅکله دغه راپورونه نه دي تایید کړي.
د لوګر د ولایتي شورا رییس قریب الله سعادت وايي چې دغه الوتکه د پاکستان دولتي نښان لري او د لکۍ په سیمه کې چې د پکتیا د اریوب ځاځي او د لوګر د ازرې ولسوالۍ ترمنځ موقعیت لري اضطراري ناسته کړې ده.
پوځي کارپوهان د افغانستان په خاوره کې د دغه پاکستانۍ الوتکې ناسته ښکاره سرغړونه بولي او وايي، د نړیوالو قوانیونو پر اساس افغان پوځیانو د دې حق درلوده چې دغه الوتکه یې په نښه کړې وای.
پوځي کارپوه عتیق الله امرخيل وايي:
"دا ښکاره تجاوز حریم هوايي ده او له هوايي حریم څخه تجاوز جرم دی او نظر په نړیوالو قوانیونو پاکستان باید د دې جرم ورکړي. "
سیاسي کارپوه احمد سعیدي وايي هوايي حریم د یوه هېواد د سیاسي او پوځي استقلال یوه برخه ده او حکومت باید د هغه هر هېواد په اړه چې د افغانستان په هوايي حریم کې مداخله کوي ملګرو ملتونو ته شکایت وکړي.
محمد حديث پردېس
