د جنبش روشنایي نننۍ مظاهره، د دغې مظاهرې په اړه غبرګونونه او د داعش د له منځه وړلو غوښتنې د کابل چاپ د ورځپاڼو مهم مطالب او تبصرې دي.
ملي ارمان
ملي ارمان ورځپاڼې په یوه تحلیلي مطلب کې لیکلي چې تیاره فکره جنبش د سیاسي کودتا په فکر کې دی.
په مطلب کې راغلي، د روښنایي په نوم جنبش ظاهراً د وارداتي برېښنا د انحصارولو هڅه کوي، خو اصلي خبره داده چې د یوه ځانګړي هېواد لهخوا یې ملاتړ کېږي او هڅه کوي چې د سیاسي کودتا د فکر له لارې خپلې ریښې پياوړې کړي.
د ملي ارمان په دې مطلب کې راغلي چې د جنبش روشنایي یو شمېر مشران د خبرو له لارې د خپلو ستونزو حل غواړي او د مطلب د لیکوال په باور، په داسې شرایطو کې چې په افغانستان کې جګړه ده، د حل ښه لاره هم خبرې دي.
د ورځپاڼې په باور، د روشنایي جنبش باید دا درک کړي چې په وارداتي برېښنا کې د ټولو ۳۴ ولایتونو مساوي حق دی.
سرنوشت
سرنوشت ورځپاڼې بیا په خپله سرمقاله کې لیکلي چې د تاریکۍ غورځنګ د زغملو نهدی.
په سرمقاله کې راغلي، د مظاهره کوونکو غوښتنه داده چې د ترکمنستان د پنځه سوه کیلو ولټه برېښنا مزي دې د سالنګ له لارې نه، بلکې د بامیانو له لارې نورو ولایتونو ته انتقال شي.
په سرمقاله کې راغلي، بامیانو ته د برېښنا د ورکولو چارې پيل شوي، خو معترض کسان غواړي خپل حرکت ته قومي بڼه ورکړي او وښيي چې دوی د ډېرو خلکو د راټولولو وړتیا لري.
د سرمقالې لیکوال ویلي، د جنبش روشنایي ډلې حرکت د ملي یووالي ضد حرکت دی او په داسې حال کې چې اکثرو ملاتړو یې پرېکون ورسره اعلان کړی، دولتیې باید مخه ونیسي.
کابل پوسټ
کابل پوسټ ورځپاڼې بیا په لومړي مخ کې د جنبش روشنایي د مسئولینو په حواله لیکلي چې سر له نننه خپل اعتراضونه او مدني حرکتونه پيلوي او تر هغو به دوام وکړي چې غوښتنې یې ومنل شي.
په مطلب کې د ولسمشر د ویاند په حواله لیکل شوي چې ویلې یې دي، د دغو مظاهرو تر شا د یو شمېر بهرنیو کړیو لاس دی او هدفیې پر حکومت فشار راوړل دي.
کابل پوسټ بیا په یوه جلا مطلب کې د داعش ګواښ ته هم یو مطلب ځانګړی کړی او لیکلي یې دي چې یو داعش هم باید له ننګرهاره ژوندی ونه وځي.
په مطلب کې راغلي، حکومت باید د داعش پر وړاندې مبارزه جدي کړي او دا ستراتېژي غوره کړي چې داعش باندې د تېښتې لارې بندې او له پښو یې وغورځوي.
ویسا
ویسا ورځپاڼې هم خپله سرمقاله د داعش ګواښ ته ځانګړې کړې او لیکلي یې دي چې د داعش د له منځه وړلو لپاره د ولسمشر ورکړل شوی مهلت پای ته ورسېد، خو داعش لا هم له منځه نهدی تللی.
په سرمقاله کې راغلي، داعش فعال دی او حکومت باید د دغې ډلې د له منځه وړلو لپاره تشې ژمنې نه، بلکې داسې عملي اقدامات وکړي چې ولسیې نتیجه وویني.