ټاکل شوې د امریکا د استازو مجلس نن د جمهوري غوښتونکو پر هغې مسودې رایې ورکړي چې له ایران سره د اټمي پروګرام د موافقې مؤثریت د کمولو په اړه یې وړاندې کړې ده.
په دې مسوده کې به د ایران له خوا د ترورېزم د هر ډول ملاتړ او یا د بشري حقونو د سرغړونې په صورت کې پر هغه هېواد نوي بندیزونه لګول کېږي، له ایرانه به د هغو اوبو پر اخېستلو بندیز لګول کېږي چې په اټمي ریکتور کې کارول کېږي او د امریکایي ډالرو د کارولو په ګډون د امریکا مالي سیسټم ته د ایران لاسرسی به له منځه ځي.
جمهوري غوښتونکې چې د استازو مجلس او سنا کنټرولوي له ایران سره د تېر کال د اټمي موافقې مخالف وه او له هغه وخته د ایران د بالسټیک توغندي له ازموینې او نورو هغو کارونو په اړه اندیښمن دي چې دوی ته پاروونکې ښکاري.
د امریکا د استازو مجلس د بهرنیو اړیکو د کمېټې مشر ایډ رویس Ed Royce چې جمهوري غوښتونکې دی، وایي دا مهمه ده چې په خپل توان سره د ده په وینا د ایران دغه ډېر خطرناک اقدام وارزول شي.
بل خوا په همدې مجلس کې د ډیموکراټانو د اقلیت تر ټولو لوړې استازي نانسي پلوسي Nancy Pelosi د سې شنبې په ورځ پر ډیموکراتانو ټینګار کړی چې د دې قانون پر خلاف رایه ورکړي.
د دوی دلیل دا دی چې دغه نوي بدلونونه کولای شي د لاسلیک شوي اټمي موافقې مسیر بدل کړي.
سپیني ماڼۍ د جولای پر لسمه نېټه د دغې مسودې د ویټو کولو ګواښ وکړ او وایي دا کار به اټمي موافقه له منځه یوسي.
د کانګرس د چارو څارونکې وایي، که دا مسوده د استازو مجلس تصویب هم کړي ښایې د سنا مجلس څخه کافي رایې وانه خلي.
د دې لپاره چې د مسودې په اړه ویټو باطله شي نو د دواړو مجلسونو دوه په دریمه استازي باید د تایید رایه ورکړي.
ځیني سیاسي څیړونکې دې کار ته د یوه داسې نمایش په سترګه ګوري چې جمهوري غوښتونکې یې د راتلونکې اوونۍ په ترڅ کې د جمهوري غوښتونکو د ملي کنوانسیون دمخه نندارې ته وړاندې کوي.
تمه ده په دغه کنوانسیون کې جمهوري غوښتونکې میلیاردر ډونالډ ټرمپ په رسمي توګه د دغه حزب له خوا د ولسمشري انتخاباتو د کاندید په توګه انتخاب شي.
ټرمپ ژمنه کړې چې ګه د نومبر د میاشتې ولسمشرۍ انتخابات وګټي، له ایران سره له دغه تړون له منځه یوسي، خو د ده سیاله کاندیده هیلري کلنټن چې د ولسمشرۍ لپاره د ډیموکراټانو احتمالي کاندیده ده، د دې تړون ملاتړ کوي.
