د لاسرسي لېنکونه

پنجشنبه ۲۸ وږی ۱۳۹۸ کابل ۰۹:۱۴

عراق کې غبرګو بمي چاودنو ٨٣ کسان وژلي


د عراق په پلازمېنه بغداد کې نن سهار دوو جلا بمي چاودنو لږ تر لږه درې اتيا کسان وژلي او يوسل او شپږاويا تنه يې ټپيان کړي دي.

د بغداد په يوه ويجاړه شوې ساحه کراده کې نن سهار د اوروژنې مامورين د پاتې اور په مړه کولو او سړک په صفا کولو بوخت وو. عيني شاهدان وايي، دلته بمي چاودنې د رختونو او مبايل ټليفون خرڅولو دکانونو ته اور واچاوه.

چارواکو اسوشېټېډ پرېس اژانس ته ويلي، نن سهار، د عراق په پلازمېنه بغداد کې غبرګو بمي چاودنو تر ٨٠ زيات کسان ووژل او يوسل او شپږاويا تنه يې ټپيان کړل.

خونړۍ هغه يې د بغداد د مرکزي برخې په کراده سيمه کې موټربم چاودنه وه، چې يوه له ګڼه ګوڼې ډکه تجارتي ساحه يې په نښه کړه. د پوليسو سرچينو او د روغتون چارواکو ويلي چې په حمله کې اته اويا کسان ووژل شول او ١٦٠ نور ټپيان شول.

ددې حملو مسؤلیت داعش ډلې په غاړه اخېستی
ددې حملو مسؤلیت داعش ډلې په غاړه اخېستی

چاودنه په داسې وخت کې وشوه چې له پېشلمي وروسته ځوانان او د کورنيو نور غړي دباندې راوتلي وو. ځينې کسان د اختر لپاره په سودا هم بوخت وو.

د اسلامي دولت ډلې يا داعش په يوه انلاين اعلاميه کې د دې حملې مسووليت ومانه او ويلي يې دي، دوى قصداً شيعه ګان په نښه کړي دي. خو خپلواکو سرچينو د دې اعلاميه کره والى نه دى تصديق کړى.

تر دې چاودنې څو ساعته وروسته د عراق صدراعظم حيدر العبادي د چاودنې ساحه وکتله. په هغو ويډيويي تصويرونو کې چې په ټولنيزو رسنيو کې خپاره شوي، د خلکو پارېدلې ډله د صدراعظم د موټرو پر کاروان چيغې وهي او صدراعظم ته د ”غله“ خطاب کوي.

دويمه چاودنه د بغداد په ختيځ کې د يوې بمي وسيلې په واسطه وشوه، چې ٥ کسان يې ووژل او ١٦ کسان يې ټپيان کړل. د دې حملې مسووليت چا نه دى منلى.

د اسوشېټېد پرېس اژانس په حواله، د مرګ ژوبلې دغه ارقام پوليسو او د روغتون چارواکو د نوم نه ښوولو په شرط تاييد کړي دي.

په بغداد کې دغه حملې څه باندې يوه اوونۍ وروسته له هغې کېږي چې عراقي ځواکونو له داعش ډلې د فلوجه ښار د بشپړې تصفيې او ازادۍ اعلان وکړ.

XS
SM
MD
LG