د افغانستان د بهرنیو چارو وزارت وایي، د شانګهای د همکاریو په سازمان کې د دایمي غړیتوب ترلاسه کولو لپاره د شرایطو پوره کول وخت ته اړتیا لري.
د دغه وزارت ویاند شکېب مستغني د پنجشنبې په ورځ خبریالانو ته وویل چې افغانستان دا مهال د سندونو د جوړولو په حال کې دی او تېر کال یې په دې سازمان کې د دایمي غړیتوب تر لاسه کولو لپاره خپله غوښتنه مطرح کړې وه.
نوموړي وویل چې له قانوني مراحلو وروسته به نهایې پریکړه د شانګهای د همکاریو سازمان د سرمشریزې په راتلونکې کومې غونډه کې ونیول شي.
ښاغلي مستغني زیاته کړه:
"د دغو سندونو بشپړول یو معیاري وخت نیسي، دا کار د افغانستان اسلامي جمهوریت له خوا روان دی وروسته له هغه چې دا اسناد تکمیلیږي د شانګهای د همکاریو سازمان دارلانشاه ته سپارل کېږي او وروسته په دې سازمان کې د افغانستان د غړیتوب په اړه یوه سرمشریزه به تصمیم نیسي."
د شانګهای سازمان بنسټ په ۲۰۰۱میلادي کال کې د څو اړخیزو امنیتي، اقتصادي او فرهنګي همکارېو لپاره د چین، روسیې، قزاقستان، قرغزستان، تاجکستان او ازبکستان له لوري کېښودل شو.
افغانستان، ایران، منګولیا، هند او پاکستان د دې سازمان څارونکي غړي دي.
تمه ده چې هند او پاکستان دا ځل د دې سازمان دایمي غړیتوب ترلاسه کړي.
د شانګهای د همکاریو په سازمان کې د افغانستان د دایمي غړیتوب هڅې په داسې حال کې کېږي چې افغان ولسمشرمحمد اشرف غني د پنجشنبې په ورځ په د دې سازمان په غونډه کې د ګډون لپاره ازبکستان ته ولاړ.
له دې وړاندې چین د شانګهای د همکاریو په سازمان کې د افغانستان د دایمي غړیتوب ملاتړ کړی.
اوس پوښتنه دا ده چې ایا په دې سازمان کې د افغانستان غړیتوب به د افغانستان په روان وضیعت څه اغیز وکړي؟
افغان کار پوه محب الله شریف په دې اړه ازادي راډيو ته وویل:
"که چېرې افغانستان وکولای شي د شانګهای د سازمان دایمي غړیتوب ترلاسه کړي دا هېواد به په داسې یوه لاسته راوړنه باندې په اقتصادي چارو کې په سیاسي او د سیمې په ډيپلوماټیکو اړیکو کې داسې برلاسي توب ترلاسه کړي چې وبه کولای شي د افغانستان دننه چې کومې ننګونې دي له دې حالته ووځي."
ښاغلي شریفي وویل چې د شانګهای د همکاریو په سازمان کې د افغانستان دایمي غړیتوب ضروري دی او د سولې امنیت، اقتصادي او په فرهنګي برخو کې د سیمې د هېوادونو همکارۍ کولای شي چې افغانستان سره مرسته وکړي.
نوموړي وویل، افغانستان کولای شي چې په دې سازمان کې کلیدي رول ترلاسه او د دې سازمان مهم غړی وي.
راپور: ناجیه ساپۍ
