د افغانستان کرکټ بورډ وايي چې په هند کې د کرکټ د ملي لوبډلې تمرینونه دوام لري.
د کرکټ بورډ ویاند فرید هوتک نن ازادي راډیو ته وویل چې په دغو ۱۵ ورځنیو تمرینونو کې د کرکټ د ملي لوبډلې ۲۵ لوبغاړو ګډون کړی دی.
ښاغلي هوتک زیاته کړه چې د دغو تمرینونو څخه هدف له درېیو اروپايي هېوادونو سره سیالیو ته چمتوالی دی.
د افغانستان د کرکټ د ملي لوبډلې سیالۍ له هالنډ،ایرلنډ او سکاټلنډ سره د جولای له څلورمې څخه پیلیږي او د اګسټ په لومړۍ نېټه پای ته رسیږي.
د افغانستان د کرکټ ملي لوبډله دغه درې واړه سیالۍ په یادو هېوادونو کې ترسره کوي.