د لاسرسي لېنکونه

سه شنبه ۲۶ وږی ۱۳۹۸ کابل ۰۲:۴۳

په پاریس کې د اروپا د فوټبال د اتلولۍ د جام سیالۍ پیلېږي


په پاريس کې د اروپا د ٢٠١٦میلادي کال د فوټبال د اتلولۍ د جام سیالۍ نن د کوربه هېواد فرانسې او رومانيا په مسابقې سره پیلېږي.

په لسو ښارونو کې چې دغه مسابقې کېږي، شاوخوا ٩٠زره پوليس، سرتېري او خصوصي ساتونکي د خلکو د امن او خونديتوب لپاره ګمارل شوي دي.

دغه مسابقې چې اوله به يې نن جمعه د فرانسې او رومانيا ترمنځ وي، يوه مياشت دوام کوي.

د رومانيا د فوټبال ملي ټيم روزونکي انګېل يوردانيسکو په پاريس کې د مسابقو تر پيل مخکې يوه کنفرانس ته وويل، د دوى فوټبالران به تر فشار لاندې وي:

"زه اټکل کوم چې د فرانسې ټيم به دغه مسابقه په تهاجمي ډول پيل کړي، زموږ پر لوبغاړو به زيات فشار ځکه وي چې دوى داسې يوه سټوډيوم ورځي چې د فرانسې د ټيم له مينه والو ډک دى. خو زه ډاډمن يم چې زما لوبغاړي هم پر مقابل لوري د غلبې لپاره تيار او ژمن دي."

په فرانسه کې د تیرې نوامبر میاشتې په تروریستي بریدونو کې د ۱۳۰ کسانو له وژل کېدو راهیسې په دې هېواد کې اوس هم بېړنى حالت نافذ دی.

يوه بريدکوونکي په ناکامه ځان وژونکې حمله کې هڅه وکړه چې د فرانسې هغه سټوډيوم ته چې اوله مسابقه او پايلوبه په کې کېږي، داخل شي.

د فرانسې صدراعظم مانوېل والس
د فرانسې صدراعظم مانوېل والس

د امنيتي اندېښنو تر څنګ د کارګرانو له خوا ناکراريو ته د لمن وهلو وېره هم کېږي.

د کارګرانو اعتراضونه د حکومت تر وروستيو اقداماتو وروسته وپارېدل چې د کار د قانون له مخې يې د کارګرو د برطرفه کولو يا هم ګمارلو چاره يې اسانه کړې ده.

د فرانسې صدراعظم مانوېل والس ويلي، له قانونه به دغه ماده ونه باسي.

خو د څو کمپنيو کارګرانو له څو ورځو راهيسې اعتصاب او اعتراض پيل کړى دى.

فرانسه په ۱۹۸۴ میلادي کال کې د اروپا د فوټبال جام د سیالیو کوربه هېواد و چې په همدې کال يې اتلوالي هم ګټلې وه.

XS
SM
MD
LG