کندز ولایت ته د دفاع او کورنیو چارو وزارتونو لوړ پوړو چارواکو د خپل سفر پر مهال وویل چې د کندز په جګړه کې د سیمې استخبارات لاس لري.
د دفاع وزارت سرپرست محمد معصوم ستانکزي په خپلو خبرو کې وویل چې کندز د منځنۍ اسیا هېوادونو د دروازې حیثت لري، نو ځکه وسله وال مخالفین هڅه کوي، څو له دې لارې د جګړې او ناامنیو لمن اسیايي هېوادونو ته وغځوي.
ښاغلي ستانکزي زیاته کړه:
"د کندز جګړه د پاکستان له پېښور او کوټې څخه کنټرولېږي او د مخابرې له لارې وسله والو طالبانو ته د جنګ لارښونې او امر ورکول کېږي، نو دا خلک زموږ د هېواد دښمنان دی."
ښاغلي ستانکزي زیاته کړه چې په نږدې راتلونکي کې به په کندز کې د وسله والو طالبانو د له منځه وړلو په هدف پراخ پوځي عملیات پیل شي، څو دغه ولایت د طالبانو له ګواښونو څخه وژغورل شي.
په ورته وخت کې د کورنیو چارو وزیر تاج محمد جاهد وویل چې کندز بیاځل سقوط نه کوي او وسله وال طالبان به خپل دغه ارمان ګور ته یوسې.
هغه زیاته کړه:
"موږ پوره پوځي امکانات په اختیار کې لرو او هڅي کو، څو د کندز ولایت د دولت ضد عناصر له شتون څخه تصفیه کړو او د دې ولایت کړېدلې ولس لپاره د ژوند کولو امنه فضا برابره کړو."
په همدې حال کې د کندز والي اسدالله عمرخېل له راغلو چارواکو څخه وغوښتل، چې دغه ولایت په بشپړه توګه د وسله والو طالبانو له حضور څخه تصفیه کړي، څو بېځایه شوي کورنۍ بېرته خپلو سیمو ته ستانه شي.
نوموړي زیاته کړه:
"د کندز ولس له طالبانو څخه نفرت لري او د سیمې خلک له امنیتي ځواکونو سره د همکار لپاره پوره چمتوالې لري او نور طالبانو ته په کندز کې د اوسېدو ځای نه دې پاتي."
بلې خواته د کندز د ولایتي شورا غړي، امرالدین ولي وویل چې داسې ژمنې د کندز ولس سره ډېرې شوي دي، خو په عمل کې څه نه دې لېدل شوي:
"تاسې باید زموږ امنیتي ځواکونه په جنګې تجهیزاتو مجهز کړي، څو ددې ولایت ټولې سیمې د وسله والو طالبانو له حضور څخه تصفیه کړي او خلکو ته د اوسا ژوند زمینه برابره کړي."
دغو لوړپوړو چارواکو په داسې حال کې له کندز ولایت څخه لېدنه وکړه چې تېره اوونۍ وسله والو طالبانو د دې ولایت د نیولو په هدف د "عمری" په نوم پراخ پوځي عملیات پیل کړي وو چې دولتي ځواکونو له ماتې سره مخامخ شو، خو لاهم ددې ولایت په شاخوا سیمو کې وسله والو طالبان فعاله حضور لري.
راپور: اجمل ارین