په افغانستان کې د ملګرو ملتونو د مرستندوی ماموریت یا یوناما تازه راپور ښيي چې د ۲۰۱۶ میلادي کال په لومړیو درېیو میاشتو کې په افغانستان ۶ سوه ملکیان وژل شوي او ۱۳۴۳ نور ټپیان شوي دي.
د یونامان له خوا په خپره شوې اعلامیه کې راغلي چې دا د تېر کال د همدې مودې په پرتله د ملکیانو په مرګ ژوبله کې دوه فیصده زیاتوالی ښيي.
وړاندې په اعلامیه کې دا یادونه هم شوې چې د ملکیانو د دغه شمېر مرګ ژوبلې ۶۰ فیصده عوامل د دولت وسله وال مخالفین او ۱۹ فیصده حکومت پلوه امنیتي ځواکونه ښودل شوي دي.
په اعلامیه کې د افغانستان لپاره د ملګرو ملتونو ځانګړي استازي نیکولای هایسم د جګړو له ښکیلو خواوو غوښتي چې د ملکیانو د ژوند خوندیتوب ته پام وکړي.
یوناما په داسې حال کې په جګړه کې د ملکیانو د مرګ ژوبلې ارقام لوړښيي چې د طالبانو د پسرلنیو عملیاتو له پيل سره په بېلابېلو ولایتونو کې جګړو زور اخیستی.
یوناما د ۲۰۱۵ میلادي کال په راپور کې ویلي وو چې په یاد کال کې ۱۱ زره ملکي وګړي مړه او ټپیان شوي وو.