اروپا ته د افغانانو له غیر قانوني مهاجرتونو سره یوه زیاته اندازه پيسې هم په قاچاقي توګه د همدغو کډوالو له خوا ایستل شوي دي.
د افغانستان بانک وایي، تېر کال اروپا ته د افغانانو له غیر قانوني مهاجرتونو سره یوه زیاته اندازه پيسې هم په قاچاقي توګه د همدغو کډوالو له خوا ایستل شوي دي.
د افغانستان بانک وایي، د اټکل له مخې هغه پیسې چې افغان کډوالو په تېر یوه کال کې اروپا ته د غیر قانوني مهاجرتونو له لارې وړي، شاوخوا دوه میلیارډه ډالرو ته رسېږي.
د افغانستان بانک ویاند ایمل هاشور د شنبې په ورځ ازادی راډیو ته وویل، دغه اندازه پيسې له یوې خوا افغانستان ته له اقتصادي اړخه ضربه رسوي او له بلې خوا ډالرو ته د خلکو غوښتنه ډېروي.
ښاغلي هاشور وړاندې وویل:
"د افغانستان بانک هم داسي شمېرې تر لاسه کړي چې دوه لکه تر دوه لکه او پنځوس زره پوري افغانان بهر ته تللې دي، دوی خپل د سفر د لګښتونو لپاره عمدتاً ډالر تر لاسه کړي دي، که دغه ارقام په تخمیني توګه و وینو ښیې چې نېږدې دوه میلیارډه ډالره به د افغانستان له اقتصاده وتلي وي."
نوموړی همدا راز وایي چې د دغه اندازه پيسو ایستل په افغانستان کې د پانګونې فرصتونه را کموي.
د افغانستان بانک ویاند همدا رنګه وایي، بل زیان چې د پيسو ایستل یې لري هغه دا دی چې ډالرو ته تقاضا ډېرېږي چې دا په خپله د افغانیو پر وړاندې د ډالرو د بیې پر لوړ والي تاثیر کوي.
د افغانستان د کډوالو چارو وزارت د معلوماتو له مخې، د تېر میلادي کال په ترڅ کې شاوخوا دوه لکه افغانان په غیر قانوني توګه اروپا ته تللي دي.
د ولسي جرګې د اقتصادي چارو د کمېسیون غړی شېر ولي وردګ وایي، له افغانستانه د پيسو ایستل د دغه هېواد د ضعیفه اقتصاد لپاره ناوړه زیانونه لري.
نوموړی په دې برخه کې د ملي وحدت حکومت مشران ملامت ګڼي او وایي:
"واقعاً هم د اقتصاد په لحاظ باندې زموږ وطن ته یوه لویه ضربه ده، د دې ټولو پړه د حکومت پر مشرانو ده چې په خپلو کې پر سیاسي کړکېچونو او تقسیماتو لګیا دي، ملت هم ځينې هېر دی، افغانستان هم ځينې هېر دی او د افغانستان اقتصادي وضعه هم ځينې هېره ده."
د راپورونو له مخې انساني قاچاق وړونکي اروپا ته د هر یوه کس د وړلو پر سر ۱۰۰ زره امریکایي ډالر غواړي.
د افغانستان حکومتي مشرانو په وار وار له خلکو غوښتي چې همدا پیسې په افغانستان کې و لګوي او له بې برخلیکه مهاجرتونو لاس واخلي.
راپور: محمد قسیم سوله مل