ټاکل شوې چې د هند صدراعظم نرېندرا مودي د راتلونکې جمعې په ورځ له کابل څخه لیدنه وکړي او د افغانستان د نوي پارلمان ودانۍ پرنیزي.
د انډین اکسپرېس په لیکنه، د دغې ودانۍ جوړول چې د هند له طرفه افغانستان ته د ډیموکراسۍ یوه سمبولیکه تحفه ده، تقریباً ساختماني چارې یې پای ته رسېدلي دي.
د دغې پروژې کار په ۲۰۰۷ کال کې د هند له خوا د دواړو هېوادنو تر منځ د دوستۍ او همکارۍ د یوې نښانې په توګه پیل شو او د دې کال د ډسمبر په وروستیو کې به پای ته ورسېږي.
ټاکل شوې وه چې د دغې ودانۍ کار په ۲۰۱۱ کال کې بشپړ شي، خو په تېرو ۴ کلونو کې درې ځلې په ټاکل شوي وخت بشپړ نه شو.
په دې وروستیو کې چې د هند د ښاري پراختیا او ادارې خدماتو وزیر د دغې ودانۍ څخه لیدنه وکړه او ټیګار یې وکړ چې د دغې ودانۍ ۹۶ سلنه کار بشپړ شوی دی.
د سیمه ییزو رسنیو د راپورونو پر بنسټ د دغې پروژې لپاره ۴۵ میلیونه ډالره ځانګړي شوي وو، خو اوس معلومه شوه چې د دغې ودانۍ پر جوړېدو ۹۰ میلیونه ډالر لګېدلي دي.
د افغانستان د پارلمان د نوې ودانۍ په جوړولو کې د مغلو د وخت له ودانیو څخه الهام اخیستل شوی.
دا ودانۍ د دارالامان او ملکې ماڼیو تر منځ پرته ده، دوه صالونونه لري چې یو يې د ۲۹۴ څوکیو پر درلودلو سره د ولسي جرګې لپاره او یو هم د ۱۹۰ څوکیو په درلودلو سره د مشرانو جرګې لپاره ځانګړي شوي دي.
په دغې ودانۍ کې ځینې دفترونه د کنفرانسونو خونې د ډوډۍ خوړلو صالون او یو صالون هم د رسنیو لپاره ځانګړی شوی دی.
راپور: محمد صادق رښتینی