د کرکټ نامتو افغان لوبغاړي له نړیوالو میدانونو څخه له رارستنېدو سره سم د هېواد په نامتو داخلي سیالیو کې د زونونو د نورو لوبغاړو تر څنګ لوبېږي.
د شپږیز ټورنمنټ د پیل رسمي مراسم د دوشنبې په ورځ ترسره شول خو د لوبډلو تر منځ بیا سیالۍ د سې شنبې په ورځ پیلېږي.
د افغانستان کرکټ بورډ وايي چې د نورو کلونو په پرتله به سږ کال شپږیزې سیالۍ بیل رنګ ولري او په کې له هر زونه تکړه لوبغاړي نیول شوي دي.
د بورډ ویاند فرید هوتک ازادي راډيو ته وویل چې د کورني کرکټ د پیاوړتیا تر څنګ به د دغو سیالیو له لارې د افغانستان کرکټ بورډ ته د نورو لوبغاړو وړتیا ورمعلومه شي.
ښاغلی هوتک وايي: " دغه سیالۍ په خپل ډول کې بې سابقې دي تر ټولو ډيره تیاري ورته نیول شوې، افغانستان په راتلونکي کې مهمې سیالۍ لري د دغې ځایه به مونږ ته لکه د عثمان غني په څېر چې له همداسې سیالیو مو پیدا کړي وو لوبغاړي په لاس راشي، د دغو سیالیو لپاره ډېر کار شوی دی."
ښاغلی هوتک وايي چې دغه سیالۍ به لس ورځې دوام وکړي او هره ورځ به دوه دوه سیالۍ ترسره شي.
د دغو سیالیو لپاره د کابل الکوزي کرکټ لوبغالي کې د تېرو کلونو په پرتله د پام وړ بدلون هم لیدل کېږي چې د کرکټ مینه وال یې خوشحاله کړي دي.
د لیدونکو لپاره څوکۍ اېښودل شوي چې د کرکټ بورډ د معلوماتو له مخې به شاوخوا شپږ زره کسان وکولای شي له نږدې خپل اتلان وګوري.
د دغو لوبو د پرانیستلو مراسمو ته راغلو څو تنو مینهوالو ازادي راډيو ته وویل خوشحاله دي چې خپل اتلان له نږدې ګوري او د خوښې وړ یوه لوبدله وهڅوي.
یو تن مینهوال وویل: "زه د کرکټ په تیره بیا د شل اوریزو سیالیو ډير شوقي یم، هڅه کوم چې دې ټولو مېچونو ته راشم او له نږدې یې وګورم، په دغو لوبډلو کې مې د سپین غر بازان د خوښې لوبډله ده. خوښېږم چې اتلان مې چې د هېواد لپاره یې ډېر کار کړی له نږدې ګورم."
یو تن بل مینهوال سیفالدین وايي: "نوم مې سیفالدین دی په قطار کې ولاړ یم چې د ننه لاړ شم او کرکټیان وګورم ډېر مې خوښېږي، تل یې مونږ ته مینه راکړې زما د مس عینک اتلان خوښېږي چې تېر کال يې سیالۍ ګټلي وه."
په دغو سیالیو کې د کابل بازانو، د مس عینک اتلانو، د سپین غر زمریانو ، د بند امیر ښامارانو، د آمو نهنګانو او د بست ساتونکو لوبډلې دي چې په کې د ملي، الف، نولس کلنو او د زونونو تکړه لوبغاړي اخیستل شوي دي.
د شپږیزو سیالیو لومړی پړاو سپین غر بازانو او دویم پړاو یې بیا د مس عینک اتلانو ګټلای وو خو د سږ کال اتلولۍ خپلولو لپاره بیا د جالبو سیالیو تمه کېږي.
راپور - یوسف خان ځدراڼ