ازادي رادیو په وروستیو کلونو کې د هېواد په بېلابېلو ولایتونو کې د بې سارې زلزلې د مرګ ژوبلې او مصیبت ځپلو په اړه تازه شمېر په ګوته کوي.
دغه زوروره زلزله چې تېره ورځ له غرمې وروسته د ۰۱:۴۰ دقیقو په شاوخوا کې وشوه، د بدخشان، پروان، بغلان، تخار، کندز، نورستان او ننګرهار ولایتونو ځینې سیمې یې ولړزولې.
د افغانستان پر دغو ولایتونو سربېره، یادې زلزلې په پاکستان، هندوستان او بنګلهدېش کې هم خلکو ته زیانونه اړولي.
د امریکا متحده ایالاتو د سروې او جیالوجې ادارې، د دغې زلزلې مرکز د بدخشان ولایت جرم ولسوالۍ ښودلې ده.
په ورته وخت کې د افغان حکومت اجراییه رییس له زلزلې وروسته، د اظطرار کمېټې له مسوولینو سره په یوې فوقالعاده ناسته کې، د اړوندو ادارو مسوولینو ته دنده وسپارله چې د پېښې له زیانمن شویو سره دې بيړنۍ مرستې وکړي.
د دغې زلزلې قوت ۷.۵ درجې ریکټر ښودل شوی دی.
ازادي رادیو چې له سیمهییزو چارواکو څخه د زلزلې د مرګ ژوبلې شمېرې اخیستي، د پام وړ زیاتوالی ښيي.
د طبیعي پېښو پر وړاندې د امادهګۍ په چارو کې د دولت وزیر ویس برمک وايي، دغې پېښې په کابل ښار کې دوه او په ټول هېواد کې، شپږ ۷۶ تنه وژلي او ۲۶۸ تنهیې ټپیان کړي دي.
همداراز له بدخشان ولایت څخه چې د زلزلې مرکز ګڼل کېږي، راپورونه وايي چې د دغه ولایتپه ۲۹ ولسوالیو کې لسګونه کسان وژل شوي او ګڼ شمېرکورونه ویجاړ شوي دي.
د دغه ولایت چارواکي له مصیبت ځپلو سره د مرستو غوښتنه کوي.
د دغه ولایت مرستیال والي محمد بیدار په دې اړه داسې څرګندونې کړي: " د تېرې ورځې په زلزله کې ۱۵ کسان مړه، ۴۵ تنه ټپیان او ۲ زره او ۷۴۰ نړېدلي دي. موږ هڅه کوو چې له مصیبت ځپلوسره مرستې وکړو."
د پروان مرستیال والي شاه ولي شاهد ازادي رادیو ته ویلي چې، په دغې پېښه کې ډیرزیان د بګرام ولسوالۍ ته رسېدلی دی.
دی وايي په پېښه کې درې کسان مړه او اته تنه ټپیان شوي دي.
دغه راز بغلان ولایت هم له پېښې خوندي نهدی پاتې او مرګ ژوبله وراوښتې.
د دغه ولایت د طبیعي پېښو پر وړاندې د مبارزې ادارې ريیس محمد نصیر کهزاد په دې اړه وايي: " په دې زلزله کې دوه کسان مړه او ۳۱ تنه ټپیان شوي دي."
یادې زلزلې د ښوونځیو زده کوونکي هم ډارولي او هغوی هم نهدي توانېدلي له دغې زلزلې ځان وژغوري.
د تخار له ولایت څخهرسېدلي رپوټونه وايي چې په سیمه کې د نجونو د یوه ښوونځي ۱۲ تنه زده کوونکې مړې او ۳۰ تنه ټپیانې شوې دي.
همدارنګه د نوموړي ولایت په بېلابېلو ولسوالیو کې نور ۱۰ کسان هم ټپیان شوي دي.
نن د ننګرهار د والي په مشرۍ د یاد ولایت د اضطرار کمېټي په ناسته کې، د ولایت چارواکو وویل چې له مصیبت ځپلو سره د مرستو رسولو په مقصد سروې روانه ده.
د ننګرهار ولایت د سرې میاشتې رييس ننګیالي یوسفزي وویل: " د تېرې ورځې په زلزله کې ۲۸ کسان وژل شوي، ۱۴۰ تنه نور ټپیان او شاوخوا ۱۰۸۲ کورونه ړنګ شوي دي. دغه زیان تر ډېره د بهسودو او روداتو ولسوالیو ته اوښتی دی. په وژل شویو کسانو کې ښځې او ماشومان هم شامل دی."
د تیرې ورځې زلزلې د سیمې یو شمیر هیوادونه هم لړځولي دي.
په دې هکله تازه راپورونه وايي چې، په پاکستان کې یې ۲۳۷ تنه وژلي او ۱۵۰۰ تنه نور کسان یې ټپیان کړي دي.